ലോക്​ഡൗണിനിടെ കേദാർനാഥ്​ യാത്ര: എം.എൽ.എക്കും സംഘത്തിനുമെതിരെ കേസ്​

ബിജ്​നോർ: ലോക്​ഡൗൺലംഘിച്ച്​ യാത്ര നടത്തിയതിന്​ എം.എൽ.എക്കും സംഘത്തിനുമെതിരെ ഉത്തർപ്ര​ദേശ്​ പൊലീസ്​​ കേസെടുത്തു. യു.പിയിലെ നൗതൻവയിൽ നിന്നുള്ള സ്വതന്ത്ര എം.എൽ.എ അമൻമണി തൃപാഠിക്കും കൂട്ടാളികൾക്കുമെതിരെയാണ്​ കസെടുത്തത്​. ഇവർ പാസ്​ പോലുമില്ലാതെ യു.പിയിൽ നിന്ന്​ ഉത്തരാഖണ്ഡിൽ പോയി വരികയായിരുന്നു. ബിജ്​നോർ ജില്ലയിലെ നാസിബബാദിൽ വെച്ചാണ്​​​ സംഘം പൊലീസിൻെറ​ പിടിയിലായത്​.

ഉത്തരാഖണ്ഡിലേക്ക്​ പോകാൻ എം.എൽ.എയെ സർക്കാർ നിയോഗിച്ചിട്ടില്ലെന്നും അംഗീകൃത യാത്രാ പാസ്​ പോലുമില്ലാതെ അനാവശ്യമായാണ്​ അദ്ദേഹം പുറത്തിറങ്ങിയതെന്നും ബിജ്നോർ പൊലീസ്​ സൂപ്രണ്ട്​ സഞ്​ജീവ്​ ത്യാഗി പറഞ്ഞു​. എം.എൽ.എക്കെതിരെ നടപടി എടുത്തുവെന്നും അദ്ദേഹത്തെ നിരീക്ഷണത്തിലാക്കുകയും കോവിഡ്​ പരിശോധനക്ക്​ വിധേയനാക്കു​കയും ചെയ്യുമെന്നും പൊലീസ്​ സൂപ്രണ്ട്​ കൂട്ടിച്ചേർത്തു. 

ലോക്​ഡൗൺ ലംഘിച്ചതിനും സർക്കാർ ഉദ്യോഗസ്ഥരോട്​ മോശമായി പെരുമാറിയതിനും തൃപാഠിയേയും കൂട്ടാളികളേയും ഉത്തരാഖണ്ഡ്​ പൊലീസ്​ കഴിഞ്ഞ ഞായറാഴ്​ച അറസ്​റ്റ്​ ചെയ്​തിരുന്നു. തുടർന്ന്​ ഇവർക്ക്​ നോട്ടീസ്​ നൽകി ഉത്തർപ്രദേശിലേക്ക്​ തന്നെ തിരിച്ചയക്കുകയായിരുന്നു.

തൃപാഠിയും മറ്റ്​ പത്ത്​ പേരും ചേർന്ന്​ ബദരിനാഥ്​, കേദാർനാഥ്​ യാത്രക്കെത്തിയതായിരുന്നുവെന്ന്​ ഉത്തരാഖണ്ഡിലെ ക്രമസമാധാന ചുമതലയുള്ള പൊലീസ്​ ഡയറക്​ടർ ജനറൽ അശോക്​ കുമാർ പറഞ്ഞു. എം.എൽ.എക്കും മറ്റ്​ 11 പേർക്കുമെതിരെ കേസെടുത്തതായും അദ്ദേഹം കൂട്ടിച്ചേർത്തു.