അ​ലോപ്പതിക്കെതിരെ വ്യാജപ്രചാരണം: രാംദേവിനെതിരെ കേസ്​

റായ്​പുർ: കോവിഡ്​ ചികിത്സക്ക്​ ഉപയോഗിക്കുന്ന അ​ലോപ്പതി മരുന്നകൾക്കെതിരെ തെറ്റായ വിവരം പ്രചരിപ്പിച്ചതിന്​ യോഗ ഗുരു രാംദേവിനെതിരെ പൊലീസ്​ കേസ്​. ഛത്തീസ്​ഗഢിലെ റായ്​പുർ പൊലീസ്​​ വ്യാഴാഴ്​ചയാണ്​ രാമകൃഷ്​ണ യാദവ്​ എന്ന രാംദേവിനെതിരെ എഫ്​​.ഐ.ആർ രജിസ്​റ്റർ ചെയ്​തത്​.

ഇന്ത്യൻ മെഡിക്കൽ അസോസിയേഷൻ (ഐ.എം.എ) ഐ‌.എം‌.എ ആശുപത്രി ബോർഡ് ചെയർമാൻ ഡോ. രാകേഷ് ഗുപ്ത, റായ്പൂർ ഘടകം പ്രസിഡന്‍റ്​ വികാസ് അഗർവാൾ എന്നിവർ ബുധനാഴ്​ച രാത്രി നൽകിയ പരാതിയിലാണ്​ കേസെടുത്തതെന്ന്​ റായ്​പുർ സീനിയർ പൊലീസ്​ സൂപ്രണ്ട്​ അജയ്​ യാദവ്​ പറഞ്ഞു. ഐ.പി.സി 188, 269, 504 വകുപ്പുകൾ പ്രകാരവും 2005ലെ ദുരന്ത നിവാരണ നിയമത്തിലെ വ്യവസ്ഥകൾ പ്രകാരവുമാണ് രാംദേവിനെതിരെ കേസെടുത്തത്.

കേന്ദ്ര സർക്കാർ, ഇന്ത്യൻ കൗൺസിൽ ഓഫ് മെഡിക്കൽ റിസർച്ച്​ (ഐസിഎംആർ) എന്നിവ അംഗീകരിച്ച കോവിഡ്​ മരുന്നുകൾക്കെതിരെ കഴിഞ്ഞ ഒരു വർഷമായി രാംദേവ് തെറ്റായ വിവരങ്ങളും ഭീഷണി പ്രസ്താവനകളും സോഷ്യൽ മീഡിയയിലൂടെ പ്രചരിപ്പിക്കുന്നതായി പരാതിയിൽ ചൂണ്ടിക്കാട്ടി.