കൈവിരലുകൾക്ക്​ നീലനിറം; കോവിഡ്​ രോഗിയെ വിദഗ്​ധ ചികിത്സയിലൂടെ രക്ഷിച്ച്​​ ഡോക്​ടർമാർ

മുംബൈ: ധമനികളിൽ രക്​തം കട്ടപിടിച്ച കോവിഡ്​ രോഗിയെ കൃത്യസമയത്തെ ചികിത്സയിലൂടെ രക്ഷിച്ച്​ ഡോക്​ടർമാർ. ഇടത് കൈയിലെ മൂന്ന് വിരലുകൾ നീലനിറമായതിനെ തുടർന്നാണ്​ 42 കാരനായ ബാന്ദ്ര നിവാസി പ്രാദേശിക ക്ലിനിക്കിൽ​ ചികിത്സ തേടിയത്​. ഇവിടെനിന്ന്​ ഡോക്​ടർ കോവിഡ്​ ടെസ്​റ്റ്​ നടത്താൻ നിർദേശിച്ചു. ഫലം പോസിറ്റീവായെങ്കിലും കൈ വിരലിലെ നീല നിറമല്ലാതെ മറ്റു ലക്ഷണങ്ങൾ ഒന്നുമുണ്ടായിരുന്നില്ല.

അതേസമയം, ഇടത് കൈയിനെ അപകടത്തിലാക്കുന്ന രക്​തം കട്ടപിടിക്കലി​െൻറ സങ്കീർണതയെക്കുറിച്ച് മനസ്സിലാക്കിയ ഡോക്​ടർ അദ്ദേഹത്തെ സെവൻഹിൽസ്​ ആശുപത്രിയിലേക്ക്​ റഫർ ചെയ്​തു. 'രോഗി രാത്രിയാണ്​ ഇവിടെ എത്തുന്നത്​. അദ്ദേഹത്തിന് പനിയോ ചുമയോ ഉണ്ടായിരുന്നില്ല. തികച്ചും സാധാരണനിലയിലായിരുന്നു. എന്നാൽ, മൂന്ന് വിരലുകളുടെ നിറം മാറിയിട്ടുണ്ട്​. ഇത് രക്​തം കട്ടപിടിച്ചതിനാലാണെന്ന്​ മനസ്സിലായി. ഓക്സിജൻ അടങ്ങിയ രക്തത്തെ ശരീരത്തി​െൻറ വിവിധ ഭാഗങ്ങളിലേക്ക് കൊണ്ടുപോകുന്ന ധമനികളിലാണ്​ ഇത്​ സംഭവിച്ചിട്ടുള്ളത്​. ഞങ്ങൾ ഉടൻ തന്നെ ചികിത്സ തുടങ്ങുകയും അയാളെ രക്ഷിക്കുകയുമായിരുന്നു' -സെവൻഹിൽസ്​ ആശുപത്രിയിലെ കാർഡിയോളജി വിഭാഗം മേധാവി ഡോ. ഗണേഷ് മനുധെയ്ൻ പറഞ്ഞു.

'പരിശോധനയിൽ ഇടത് കൈയിലെ രണ്ട് ധമനികളിൽ ഒന്നിന് ഭാഗിക തടസ്സവും മറ്റൊന്നിന്​ പൂർണ്ണ തടസ്സവുമുണ്ടെന്ന് കണ്ടെത്തി. രക്തം കട്ടപിടിച്ച്​ അവയവം നിർജീവമാകാനുള്ള സാധ്യത ഏറെയായിരുന്നു. അതിനാൽ രക്തയോട്ടം പുനഃസ്ഥാപിക്കേണ്ടത് പ്രധാനമായി' -ഡോ. മനുധെയ്ൻ കൂട്ടിചേർത്തു.

ത്രോംബോ-സക്ഷൻ ത്രോംബെക്ടമി' എന്ന ചികിത്സ രീതിയിലൂടെയാണ് രക്​തം​ കട്ടപിടിച്ചത്​ പരിഹരിച്ചത്​. രോഗിയുടെ വലത് തുടയിൽനിന്ന് ഇടത് കൈയിലേക്ക് കുഴൽ സ്​ഥാപിച്ച്​ 24 മണിക്കൂർ നിലനിർത്തി. കൂടാതെ രക്​തം അലിയിക്കാൻ മരുന്നും നൽകി. 24 മണിക്കൂറിനുള്ളിൽ നീലനിറം അപ്രത്യക്ഷമായി.

ഇൗ രോഗിയടക്കം കഴിഞ്ഞ മാസം ഡോ. മനുധെയ്​നും സംഘവും ഇത്തരത്തിലുള്ള അഞ്ചുപേരെയാണ്​ ചികിത്സിച്ചത്​. ഇതിൽ ബാക്കി നാലുപേർക്കും മറ്റു ലക്ഷണങ്ങളുമുണ്ടായിരുന്നു.

കോവിഡി​െൻറ ആദ്യ തരംഗത്തിൽ രക്​തം കട്ടപിടിക്കുന്ന കേസുകൾ കുറവായിരുന്നുവെന്ന്​ ഡോ. മനുധെയ്ൻ പറയുന്നു. രക്തം കട്ടപിടിക്കുന്ന കോവിഡ് രോഗികൾക്ക് ഹൃദയാഘാതത്തിനടക്കം സാധ്യതയുണ്ട്​. എന്നാൽ, നേരത്തെയുള്ള രോഗനിർണയവും മരുന്നും ആവശ്യമായ ചികിത്സയും വഴി ഇവരുടെ ജീവൻ രക്ഷിക്കാൻ കഴിയുമെന്നും അദ്ദേഹം വ്യക്​തമാക്കി.