ട്രാഫിക് നിയമലംഘനത്തിന് ഇതുവരെ 4,800 രൂപ പിഴ; ബൈക്ക് കത്തിച്ച് യുവാവിന്‍റെ പ്രതിഷേധം

ഹൈദരാബാദ്: ഗതാഗത നിയമലംഘനത്തിന്​ പലതവണ ​പൊലീസ്​ പിഴ ഈടാക്കിയത്​ 4,800 രൂപ. പ്രതിഷേധിച്ച്​ ബൈക്ക്​ കത്തിച്ച്​ യുവാവ്​. തെലങ്കാനയിലെ വികരാബാദ്​ ജില്ലയിലാണ്​ സംഭവം. കർഷക തൊഴിലാളിയായ തളരി സങ്കപ്പയാണ്​ പല തവണകളായി പൊലീസ് 4,800 രൂപ പിഴ ഈടാക്കിയതില്‍ കുപിതനായി ബൈക്ക് കത്തിച്ചത്​.

ഹെൽമറ്റ്​ ഇല്ലാതെ ബൈക്കോടിച്ചതടക്കം പലതവണ പൊലീസ്​ പരിശോധനയിൽ പിടിയിലായപ്പോളാണ്​ സങ്കപ്പക്ക്​ ഇത്രയധികം തുക പിഴ വന്നത്​. ഇതിൽ പലതും അടച്ചിരുന്നില്ല. കഴിഞ്ഞ ദിവസം പെഡ്​ഡമുൽ ഗ്രാമത്തില്‍നിന്ന് തന്തൂരിലേക്ക് ബൈക്കില്‍ പോകുന്നതിനിടെ സങ്കപ്പയെ പൊലീസ് വീണ്ടും പിടികൂടി. തുടര്‍ന്ന് ഇതുവരെ അടയ്ക്കാതിരുന്ന പിഴത്തുക മുഴുവന്‍ അടയ്ക്കണമെന്നും അതിനു ശേഷമേ പോകാന്‍ അനുവദിക്കുകയുള്ളൂവെന്നും പറഞ്ഞു. ഇതോടെ സങ്കപ്പ ബൈക്കുമായി അതിവേഗത്തില്‍ രക്ഷപ്പെടുകയായിരുന്നു.

ശേഷം ബൈക്ക്​ കർഷക സഹകരണ സംഘം ഓഫിസിന്‍റെ പിന്നി​ൽ നിർത്തിയശേഷം പെട്രോൾ ഒഴിച്ച്​ കത്തിക്കുകയായിരുന്നു. പിന്തുടര്‍ന്നെത്തിയ പൊലീസ് എന്തിനാണ് ബൈക്ക് കത്തിച്ചതെന്ന് ചോദിച്ചപ്പോള്‍ നിരന്തരം പിഴ ഈടാക്കുന്നതില്‍ കുപിതനായാണ് താന്‍ ഇത് ചെയ്തതെന്ന്​ യുവാവ് പറയുകയും ചെയ്​തു.