സർക്കാറിനെ ഭയപ്പെടണോ അതോ പൊരുതണോ, ; തീരുമാനമെടുക്കേണ്ട സമയമായെന്ന്​ ഉദ്ധവ്​

ന്യൂഡൽഹി: കേന്ദ്രം ഭരിക്കുന്ന നരേന്ദ്രമോദി സർക്കാറിനെ ഭയപ്പെടണോ അവർക്കെതിരെ പൊരുതണോയെന്ന്​ തീരുമാനമെടുക്കേണ്ട സമയമായെന്ന്​ മഹാരാഷ്​ട്ര മുഖ്യമന്ത്രി ഉദ്ധവ്​ താക്കറെ. സോണിയ ഗാന്ധിയുടേയും മമത ബാനർജിയുടേയും നേതൃത്വത്തിൽ നടത്തിയ പ്രതിപക്ഷ പാർട്ടികളിലെ മുഖ്യമന്ത്രിമാരുടെ യോഗത്തിലാണ്​ ഉദ്ധവ്​ താക്കറെയുടെ പരാമർശം. നീറ്റ്​, ജെ.ഇ.ഇ പരീക്ഷകൾ നടത്താനുള്ള കേന്ദ്രസർക്കാർ തീരുമാനത്തെ തുടർന്നാണ്​ പ്രതിപക്ഷ മുഖ്യമന്ത്രിമാരുടെ യോഗം വിളിച്ചത്​. മഹാരാഷ്​ട്ര ലോക്​ഡൗണിൽ നിന്ന്​ ഘട്ടം ഘട്ടമായി പുറത്ത്​ വരുന്നേയുള്ളു. സ്​കൂളുകൾ ഇപ്പോഴും അടഞ്ഞ്​ കിടക്കുകയാണെന്നും ഉദ്ധവ്​ താക്കറെ പറഞ്ഞു.

ഫെഡറലിസത്തെ തകർത്താണ്​ കേന്ദ്രസർക്കാർ മുന്നോട്ട്​ പോകുന്നതെന്ന്​ പശ്​ചിമബംഗാൾ മുഖ്യമന്ത്രി മമത ബാനർജി പറഞ്ഞു. പരീക്ഷകൾ മാറ്റിവെക്കുന്നത്​ സംബന്ധിച്ച പ്രശ്​നത്തിൽ സുപ്രീംകോടതിയെ സമീപിക്കണം. കേന്ദ്രസർക്കാർ തീരുമാനം വിദ്യാർഥികളെ മാനസികമായി സമ്മർദത്തിലാക്കും. ഇതുപോലൊരു അരാജകത്വം ജനാധിപത്യത്തിൽ കണ്ടിട്ടില്ല. സ്ഥിതി ഗൗരവതരമാണ്​. കുട്ടികൾക്ക്​ വേണ്ടി നമ്മൾ സംസാരിക്കണമെന്ന്​ മമത പറഞ്ഞു. പരീക്ഷകൾക്ക്​ പറ്റിയ സമയമല്ല ഇതെന്നും ജാർഖണ്ഡ്​ മുഖ്യമന്ത്രി ഹേമന്ത്​ സോറൻ പറഞ്ഞു. സുപ്രീംകോടതിയെ സമീപിക്കുന്നതിന്​ മുമ്പ്​ സംസ്ഥാന മുഖ്യമന്ത്രിമാർ പ്രധാനമന്ത്രിക്കും രാഷ്​ട്രപതിക്കും പരാതി നൽകണമെന്നും അദ്ദേഹം വ്യക്​തമാക്കി.

കോൺഗ്രസ്​ മുഖ്യമന്ത്രിമാരായ അമരീന്ദർ സിങ്​, ഭുപേഷ്​ ഭാഗൽ, അശോക്​ ഗെഹ്​ലോട്ട്​, വി.നാരായണ സ്വാമി തുടങ്ങിയവർ സോണിയ വിളിച്ച യോഗത്തിൽ പ​െങ്കടുക്കുന്നുണ്ട്​. സെപ്​തംബറിൽ ത​ന്നെ നീറ്റ്​, ജെ.ഇ.ഇ പരീക്ഷകൾ നടത്താനാണ്​ കേന്ദ്രസർക്കാർ തീരുമാനം. ഇതിനെതിരെ വ്യാപക പ്രതിഷേധമാണ്​ ഉയരുന്നത്​.