ഖാപ് പഞ്ചായത്ത് നിശ്ചയിച്ച പ്രകാരം നടക്കും; ആത്മാഭിമാനത്തിന് വേണ്ടിയാണ് പോരാട്ടം -ബജ്റംഗ് പൂനിയ

ന്യൂഡൽഹി: മുൻ നിശ്ചയിച്ച പ്രകാരം തന്നെ ഡൽഹിയിൽ ഖാപ് പഞ്ചായത്ത് നടത്തുമെന്ന് ഗുസ്തി താരം ബജ്റംഗ് പൂനിയ. ആത്മാഭിമാനത്തിന് വേണ്ടിയാണ് ഞങ്ങൾ പോരാടുന്നത്. അവർ പുതിയ പാർലമെന്റ് മന്ദിരം ഉദ്ഘാടനം ചെയ്യുന്നു. എന്നാൽ, ഇതിനൊപ്പം തന്നെ ജനാധിപത്യത്തെ കൊല്ലുകയാണ് അവർ ചെയ്യുന്നത്. കസ്റ്റഡിയിലെടുത്ത തങ്ങളുടെ അനുയായികളെ ഉടൻ വിട്ടയക്കണമെന്നും പൂനിയ ആവശ്യപ്പെട്ടു.

ഗുസ്തി താരങ്ങളുടെ സമരത്തിന് പിന്തുണ പ്രഖ്യാപിച്ച് വനിതാ ഖാപ്പ് പഞ്ചായത്ത് നടത്താനായി ഡൽഹിയിലേക്ക് മാർച്ച് നടത്തിയ പഞ്ചാബ് കിസാൻ മസ്ദൂർ സംഘർഷ് കമ്മിറ്റിയെ അമ്പാല അതിർത്തിയിൽ പൊലീസ് തടഞ്ഞു. ഗുസ്തി താരങ്ങൾക്ക് വേണ്ടി നടത്തുന്ന വനിതാ ഖാപ്പ് പഞ്ചായത്തിൽ പ​​ങ്കെടുക്കാൻ അമൃത്സറിൽ നിന്നാണ് കർഷക സംഘം യാത്ര തുടങ്ങിയത്.

ഭാരതീയ കിസാൻ യൂനിയൻ നേതാവ് ഗുർനാം സിങ് ചരുണി ഉൾപ്പെ​ടെ നിരവധി കർഷക നേതാക്കളെ പൊലീസ് കസ്റ്റഡിയിലെടുത്തു. പുലർച്ചെ 4.45 ഓടെയാണ് സംഭവം. ഇവരുടെ സംഘത്തിൽ ഭൂരിഭാഗവും സ്ത്രീകളാണ്. പ്രദേശം പൊലീസ് വളഞ്ഞതിനാൽ ഇവർ ദേശീയപാത 44 ലെ മാൻജി സാഹിബ് ഗുരുദ്വാരയിൽ രാത്രി തങ്ങുകയായിരുന്നു.

തുടർന്ന് പൊലീസ് ഗുരുദ്വാരയുടെ പ്രവേശനകവാടങ്ങളെല്ലാം അടച്ചുപൂട്ടി. സംഘത്തെ പോകാൻ അനുവദിക്കുകയോ പ്രതിഷേധം നേരിടുകയോ ചെയ്യണമെന്ന് സർക്കാറിന് കർഷക നേതാക്കൾ മുന്നറിയിപ്പ് നൽകി.

പ്രാ​യ​പൂ​ർ​ത്തി​യാ​കാ​ത്ത പെ​ൺ​കു​ട്ടി​യ​ട​ക്കം ഏ​ഴ്‌ വ​നി​താ ഗു​സ്‌​തി​താ​ര​ങ്ങ​ളെ ലൈം​ഗി​ക​മാ​യി പീ​ഡി​പ്പി​ച്ച കേ​സി​ൽ പ്ര​തി​യാ​യ ഗു​സ്‌​തി ഫെ​ഡ​റേ​ഷ​ൻ പ്ര​സി​ഡ​ന്‍റും ബി.​ജെ.​പി എം.​പി​യു​മാ​യ ബ്രി​ജ്‌ ഭൂ​ഷ​ണെ അ​റ​സ്റ്റ്‌ ചെ​യ്യ​ണ​മെ​ന്ന്‌ ആ​വ​ശ്യ​പ്പെ​ട്ടാണ്​ ഡ​ൽ​ഹി ജ​ന്ത​ർ​മ​ന്ത​റി​ൽ ഗു​സ്തി താ​ര​ങ്ങ​ൾ സമരം നടത്തുന്നത്.

ഹ​രി​യാ​ന, രാ​ജ​സ്​​ഥാ​ൻ, പ​ഞ്ചാ​ബ്, യു.​പി സം​സ്ഥാ​ന​ങ്ങ​ളി​ൽ​നി​ന്നു​ള്ള വ​നി​ത​ക​ളാ​ണ്​ ഖാ​പ്​ പ​ഞ്ചാ​യ​ത്തി​നാ​യി ഡ​ൽ​ഹി​യി​ൽ എ​ത്തു​മെന്ന് അറിയിച്ചത്. ജ​ന്ത​ർ​മ​ന്ത​റി​ൽ​നി​ന്ന് 11.30ന്​ ​പാ​ർ​ല​മെ​ന്‍റി​ലേ​ക്ക്​ മാ​ർ​ച്ചാ​യി പു​റ​പ്പെ​ടാനായിരുന്നു തീരുമാനം. ​ഇ​തോ​ടൊ​പ്പം ഡ​ൽ​ഹി​യു​ടെ അ​തി​ർ​ത്തി​ക​ളി​ൽ​നി​ന്ന്​ ക​ർ​ഷ​ക​ര​ട​ക്ക​മു​ള്ള സം​ഘം പാ​ർ​ല​മെ​ന്‍റി​ലേ​ക്ക്​ മാ​ർ​ച്ച്​ ന​ട​ത്താനും തീരുമാനിച്ചിരുന്നു.