പരീക്ഷയിൽ കോപ്പിയടിക്കുമെന്ന പേടി; രാജസ്​ഥാനിലെ മൂന്ന്​ ജില്ലകളിൽ ഇന്‍റർനെറ്റിന്​ താൽക്കാലിക വിലക്ക്​

ബിക്കാനീർ: പട്വാരി റിക്രൂട്ട്‌മെന്റ് പരീക്ഷയുടെ പശ്ചാത്തലത്തിൽ രാജസ്​ഥാനിലെ ബിക്കാനീർ, ജയ്​പുർ, ദൗസ ജില്ലകളിൽ ശനി, ഞായർ ദിവസങ്ങളിൽ ഇന്‍റർനെറ്റ്​ സേവനങ്ങൾ താൽക്കാലികമായി വിച്​ഛേദിക്കും. ബിക്കാനീർ ഡിവിഷനൽ കമീഷണർ ബി.എൽ. മെഹ്​റയുടെ ഉത്തരവ് പ്രകാരം രാവിലെ ആറ്​ മുതൽ വൈകീട്ട്​ ആറ്​ ​വരെയാണ്​ ഇന്‍റർനെറ്റ്​ സേവനങ്ങൾ പരിധിക്ക്​​ പുറത്താവുക.

2ജി, 3ജി, 4ജി ഡാറ്റ, ബൾക്ക് എസ്.എം.എസ്/എം.എം.എസ്, വാട്ട്‌സ്ആപ്പ്, ഫേസ്ബുക്ക്, ട്വിറ്റർ, മറ്റ് സോഷ്യൽ മീഡിയ പ്ലാറ്റ്​​ഫോമുകൾ എന്നിവക്കെല്ലാം വിലക്കുണ്ടാകും. അതേസമയം വോയ്​സ്​ കാൾ, ലാൻഡ്​ലൈൻ സേവനം, ആശുപത്രികൾ, ബാങ്കുകൾ, വ്യവസായ സ്​ഥാപനങ്ങൾ എന്നിവയുടെ ബ്രോഡ്​ബാൻഡ്​ കണക്​ഷൻ എന്നിവക്ക്​ തടസ്സമുണ്ടാകില്ല.

കോപ്പിയടിക്കലും ചോദ്യപേപ്പർ ചോർച്ച പോലുള്ളവ സംബന്ധിച്ച വ്യാജ വാർത്തകൾ പ്രചരിപ്പിക്കുന്നതും​ തടയാനാണ്​ ഇന്‍റർനെറ്റ്​ ബന്ധം വിച്​ഛേദിക്കുന്നത്​. ഉത്തരേന്ത്യയിൽ നടക്കുന്ന വിവിധ പരീക്ഷകളിൽ ആധുനിക സംവിധാനങ്ങളുടെ സഹായത്തോടെ കോപ്പിയടിക്കുന്നതായി നേരത്തെ കണ്ടെത്തിയിരുന്നു. സർക്കാർ ജോലിക്കായി നടത്തുന്ന​ പട്വാരി റിക്രൂട്ട്‌മെന്‍റിൽ 5300 ഒഴിവുകളിലേക്ക്​ രണ്ട്​ ലക്ഷം പേരാണ്​ പരീക്ഷ എഴുതുന്നത്​.

സെപ്​റ്റംബർ 26നും രാജസ്​ഥാനിൽ ഇത്തരത്തിൽ ഇന്‍റർനെറ്റ്​ വിച്​ഛേദിച്ചിരുന്നു. സംസ്​ഥാനത്തെ സർക്കാർ സ്​കൂളുകളിലെ അധ്യാപക നിയമനത്തിനായി നടത്തുന്ന പരീക്ഷയിലെ തട്ടിപ്പ്​ തടയാനായിരുന്നു നടപടി​.