സമരം തടയാനാകില്ല, കാർഷിക നിയമങ്ങൾ സർക്കാർ മരവിപ്പിച്ചില്ലെങ്കിൽ ഞങ്ങളത്​ ചെയ്യും -സുപ്രീം കോടതി

ന്യൂഡൽഹി: കർഷക പ്രക്ഷോഭം ശക്​തമായതോടെ മൂന്ന് കാർഷിക നിയമങ്ങളും നടപ്പാക്കുന്നത് താൽക്കാലികമായി മരവിപ്പിക്കാനാകുമോ എന്ന്​ സുപ്രീം കോടതി കേന്ദ്ര സർക്കാറിനോട് ആരാഞ്ഞു. 'നിങ്ങൾ നിയമങ്ങൾ നിർത്തലാക്കുമോ, ഇല്ലെങ്കിൽ ഞങ്ങൾ നിർ​ത്തിവെക്കാം. ഇവിടെ ഈഗോയുടെ ആവശ്യമില്ല' - കോടതി പറഞ്ഞു.

കാർഷിക നിയമങ്ങളെയും ഡൽഹി അതിർത്തിയിലെ കർഷക പ്രക്ഷോഭത്തെയും ചോദ്യം ചെയ്ത് സമർപ്പിച്ച ഹരജിയിൽ വാദം കേൾക്കുന്നതിനിടെയാണ് കോടതിയുടെ പരാമർശം. കർഷക സമരം കൈകാര്യം ചെയ്​തതിൽ സുപ്രീം കോടതി കേന്ദ്രത്തെ അതൃപ്​തി അറിയിച്ചു. ചർച്ചകളിൽ തീരുമാനം ആകാത്തത്​ എന്തുകൊണ്ടാണ്​. കഴിഞ്ഞതവണ ചർച്ച നടക്കുന്നുവെന്ന്​ പറഞ്ഞിരുന്നു. എന്നിട്ടും തീരുമാനമായില്ല.

കർഷക സമരം ചർച്ച ചെയ്യാൻ സമിതിയെ നിയോഗിക്കണം. സമിതിയുടെ റിപ്പോർട്ട്​ വരുന്നതുവരെ നിയമം നടപ്പാക്കുന്നത്​ സ്​റ്റേ ചെയ്യും. സമരം കൂടുതൽ രൂക്ഷമാവുകയാണ്​. നിരവധി പേരാണ്​ ആത്​മഹത്യ ചെയ്​തത്​. കർഷകരുടെ രക്​തം കൈയിൽ പുരളാൻ ആഗ്രഹിക്കുന്നില്ല. കൂടിയാലോചനയില്ലാതെ നിയമം ഉണ്ടാക്കിയതാണ്​ സമരത്തിന്​ കാരണം. നിയമം സ്​റ്റേ ചെയ്യുന്നത്​ വരെ കർഷകർക്ക്​ പ്രതിഷേധം തുടരാമെന്നും കോടതി പറഞ്ഞു.

അതേസമയം, കമ്മിറ്റി രൂപീകരിക്കാമെന്നും പക്ഷെ നിയമങ്ങൾ സ്​റ്റേ ചെയ്യരുതെന്നും​ സർക്കാറിനുവേണ്ടി ഹാജരായ അറ്റോർണി ജനറൽ കെ.കെ. വേണുഗോപാൽ കോടതിയെ അറിയിച്ചു. 'രണ്ടോ മൂന്നോ സംസ്ഥാനങ്ങളിൽ നിന്നുള്ള കർഷകർ മാത്രമാണ് സമരത്തിനുള്ളത്. മറ്റു ഭാഗത്തെ കർഷകർ ഇതിൽ പങ്കാളികളല്ല' -അറ്റോർണി ജനറൽ പറഞ്ഞു.