രിഹാനയും തുൻബെർഗും തുടങ്ങി; ഇന്ത്യയിലെ കർഷക പ്രക്ഷോഭം ലോകശ്രദ്ധയിലേക്ക്​

​ഇന്ത്യയിൽ പടർന്നുപിടിക്കുന്ന കർഷക പ്രക്ഷോഭത്തിന്​ പിന്തുണയുമായി പോപ്​ ഗായിക രിഹാനയും പരിസ്​ഥിതി പ്രക്ഷോഭങ്ങളിലെ കൗമാര മുഖം ​ഗ്രെറ്റ തു​ൻബെർഗും മണിക്കൂറുകളുടെ ഇടവേളകളിൽ നൽകിയ ആഗോള ശ്ര​ദ്ധ അതിവേഗം ഏറ്റെടുത്ത്​ ലോകം. ഇന്ത്യയിൽ ആഴ്ചകളായി അണയാതെ കത്തിയിട്ടും ഇതുവരെ ലോകം കാതോർക്കാതിരുന്ന പ്രക്ഷോഭം​ അതിവേഗം പുതിയ സമരമുഖങ്ങൾ തുറക്കുകയാണ്​. ​കടുത്ത പ്രതിഷേധമറിയിച്ച്​ കാനഡ ഉൾപെടെ രാജ്യങ്ങൾ നേരത്തെ രംഗത്തുവന്നിരുന്നുവെങ്കിലും അതുനൽകാത്ത ആവേശമാണിപ്പോൾ സമൂഹ മാധ്യമങ്ങളിലും പുറത്തും പടരുന്നത്​.

കേന്ദ്രം പുതുതായി അംഗീകാരം നൽകിയ കാർഷിക നിയമങ്ങൾക്കെതിരെ സമരജ്വാല തീർത്ത്​ ഡൽഹിയിലും പരിസരങ്ങളിലും തമ്പടിച്ച പതിനായിരക്കണക്കിന്​ കർഷകരെ കുറിച്ച്​ എന്തുകൊണ്ടാണ്​ ഇനിയും മൗനം പാലിക്കുന്നതെന്നായിരുന്നു അമേരിക്കക്കാരിയായ പോപ്​ ഗായിക രിഹാനയുടെ സമൂഹ മാധ്യമ പ്രതികരണം. ഇന്ത്യയിലെ കർഷകസമരത്തിനൊപ്പം നിൽക്കുന്നുവെന്ന്​ ​സ്വീഡിഷ്​ ആക്​ടിവിസ്റ്റ്​ ഗ്രെറ്റയും ട്വീറ്റ്​ ചെയ്​തു. ഇരുവരെയും തള്ളി വിദേശകാര്യ മന്ത്രാലയം വാർത്താകുറിപ്പുമായി രംഗത്തെത്തിയെങ്കിലും ആഗോളതലത്തിൽ പ്രതിഷേധം പടരുകയാണ്​.

യു.എസ്​ വൈസ്​ പ്രസിഡന്‍റ്​ കമല ഹാരിസിന്‍റെ അടുത്ത ബന്ധുവും യു.എസ്​ അഭിഭാഷകയുമായ മീന ഹാരിസ്​ കടുത്ത ഭാഷയിലാണ്​ പ്രതിഷേധമറിയിച്ചത്​. ഇന്‍റർനെറ്റ്​ മുടക്കിയും സൈനികരെ ഇറക്കി കർഷക സമരക്കാ​ർക്കെതിരെ അതിക്രമം നടത്തിയും മുന്നോട്ടുപോകുന്നത്​ നമ്മെ രോഷാകുലരാക്കേണ്ടതുണ്ടെന്ന്​ മീന പ്രതികരിക്കുന്നു. ചൊവ്വാഴ്ച രിഹാന ട്വിറ്ററിൽ പരസ്യ പ്രതിഷേധവുമായി എത്തിയതോടെ അവരെ പിന്തുടരുന്ന 11 കോടിയോളം ആരാധകർ മാത്രമല്ല, മറ്റുള്ളവരും കർഷക സമര​ത്തിന്​ പിന്തുണയുമായി രംഗത്തെത്തി. മണിക്കൂറുകൾക്കിടെ ലക്ഷങ്ങളാണ്​ ട്വീറ്റിന്​ ലൈക്​ നൽകിയത്​. ഒരു ലക്ഷത്തിലേറെ തവണ റീട്വീറ്റ്​ ചെയ്യപ്പെടുകയും ചെയ്​തു. ഡൽഹിയിലും ഹരിയാനയിലും സമരമുഖത്തുള്ള കിസാൻ ഏക്​ത മോർച്ചയുടെ ട്വിറ്റർ ഹാൻഡ്​ലും രിഹാനക്ക്​ നന്ദിയോതി രംഗത്തെത്തി.

ആഴ്ചകൾക്ക്​ മുമ്പുതന്നെ കാനഡ ഉൾപെടെ രാജ്യങ്ങൾ പരസ്യ പ്രതികരണവുമായി രംഗത്തെത്തിയിരുന്നു. കാനഡയിലെ മോ​ൺട്രിയാൽ, ടോറ​േന്‍റാ തുടങ്ങി മുൻനിര നഗരങ്ങളിൽ നടന്ന സമരങ്ങളിൽ ആയിരങ്ങൾ പ​ങ്കെടുത്തതും വാർത്തയായി. കാനഡയിൽ രണ്ടു ശതമാനത്തിൽ താഴെയാണ്​ സിഖ്​ ജനസംഖ്യയെങ്കിലും കുടിയേറ്റ സമൂഹങ്ങളിൽ സ്വാധീനവും ശക്​തിയും ട്രൂഡോ മന്ത്രിസഭയിൽ വരെ പ്രകടമാണ്​.

അമേരിക്കയിൽ കോൺഗ്രസ്​ വിദേശകാര്യ സമിതി അംഗം ജിം കോസ്റ്റയും കർഷക സമരത്തിന്​ പിന്തുണ അറിയിച്ച്​ രംഗത്തെത്തിയിട്ടുണ്ട്​. ആഗോള തലത്തിൽ വ്യാപകമായി പ്രതിഷേധം മുഴങ്ങു​േമ്പാഴും അവയെ അവഗണിച്ചും വിമർശിച്ചും മാറ്റിനിർത്താനാണ്​ കേന്ദ്ര സർക്കാർ ശ്രമം. ഇത്തരക്കാരുടെ പ്രതികരണങ്ങൾക്ക് കൃത്യതയോ ഉത്തരവാദിത്തമോ ഇല്ലാത്തതെന്ന് വിദേശകാര്യ മന്ത്രാലയം പുറത്തിറക്കിയ വാർത്താകുറിപ്പിൽ ചൂണ്ടിക്കാട്ടുന്നു.

'ചർച്ചകൾക്കും പ്രതിവാദങ്ങൾക്കും ശേഷമാണ് കാർഷിക മേഖലയെ പരിഷ്കരിക്കുന്ന നിയമങ്ങൾ ഇന്ത്യൻ പാർലമെന്‍റ് പാസാക്കിയത്. ഈ പരിഷ്കാരങ്ങൾ വിപുലമായ വിപണി സാധ്യതയും കർഷകർക്ക് കൂടുതൽ ഗുണവും നൽകുന്നു. സാമ്പത്തിക, പാരിസ്ഥിതിക സുസ്ഥിര കൃഷിക്ക് പുതിയ നിയമങ്ങൾ വഴിയൊരുക്കുന്നു. ഇന്ത്യയുടെ ചില ഭാഗങ്ങളിലെ വളരെ ചെറിയ വിഭാഗം കർഷകർക്ക് ഈ പരിഷ്കാരങ്ങളിൽ ഇളവ് അനുവദിച്ചിട്ടുണ്ട്. പ്രതിഷേധക്കാരുടെ വികാരത്തെ മാനിച്ച് കേന്ദ്ര സർക്കാർ കർഷകരുടെ പ്രതിനിധികളുമായി നിരവധി ചർച്ചകൾക്ക് തുടക്കമിട്ടു. കർഷകരുമായി 11 തവണ ചർച്ച നടന്നിട്ടുണ്ട്. നിയമങ്ങൾ മരവിപ്പിക്കാമെന്ന് പോലും കേന്ദ്ര സർക്കാർ വാഗ്ദാനം ചെയ്തിട്ടുണ്ട്​'- വിദേശകാര്യ മന്ത്രാലയം ചൂണ്ടിക്കാട്ടുന്നു. ആഗോള ശ്രദ്ധ ലഭിക്കുന്നതോടെ സമരത്തിന്​ ആവേശം കൂട​ുമെന്ന ആശങ്ക ബന്ധപ്പെട്ട കേന്ദ്രങ്ങളെ അസ്വസ്​ഥമാക്കിയേക്കും.