കർഷകർ സമരം വീണ്ടും ശക്തമാക്കുന്നു; അതിവേഗപാത ഉപരോധത്തിന് തുടക്കം

ന്യൂഡൽഹി: കാർഷിക നിയമങ്ങൾക്കെതിരായ സമരം കർഷകർ വീണ്ടും ശക്തമാക്കുന്നു. ഇതിൻെറ ഭാഗമായി ഡൽഹിക്ക് ചുറ്റുമുള്ള കെ.എം.പി അതിവേഗപാത കർഷകർ ഉപരോധിക്കുകയാണ്. 24 മണിക്കൂർ നീളുന്ന ഉപരോധം ശനിയാഴ്ച രാവിലെ എട്ടോടെ ആരംഭിച്ചു. പാർലമെൻറ് കാൽനട ജാഥക്ക് മുന്നോടിയായാണ് ഉപരോധം സംഘടിപ്പിച്ചിരിക്കുന്നത്.

കുണ്ഡ്​ലി - മനേസർ - പൽവാൽ അതിവേഗ പാതയിലെ ടോൾ പ്ലാസ ഉപരോധത്തിന് നൂറുകണക്കിന് കർഷകരാണ് എത്തിയിരിക്കുന്നത്. അടിയന്തര ആവശ്യങ്ങൾക്കുള്ള വാഹനങ്ങൾ കടത്തി വിടുന്നുണ്ട്.

ഏപ്രിൽ 13ന്​ ഡൽഹി അതിർത്തികളിൽ കർഷകർ ബൈശാഖി ആഘോഷം സംഘടിപ്പിക്കും. ഏപ്രിൽ 14ന്​ ഭരണഘടന ശിൽപ്പി അംബേദ്​കറിന്‍റെ ജന്മദിനത്തിൽ സംവിധാൻ ബച്ചാവോ ദിവസ്​ (ഭരണഘടന സംരക്ഷണ ദിനം) ആചരിക്കാനും പദ്ധതിയുണ്ട്.

കേന്ദ്രത്തിന്‍റെ മൂന്ന്​ കാർഷിക നിയമങ്ങൾക്കെതിരെ 2020 നംവബർ മുതൽ ഡൽഹി അതിർത്തിയിൽ കർഷക സംഘടനകൾ പ്രതിഷേധിക്കുകയാണ്​. കർഷകർ സമരം നിർത്തി പോയി എന്ന് സർക്കാർ വിമർശിച്ചിരുന്നു. എന്നാൽ, കർഷകർ വയലുകളിൽ കൃഷി ചെയ്യാൻ പോയതാണെന്നും അധികൃതർ ബംഗാൾ തെരഞ്ഞെടുപ്പ് തിരക്കിൽനിന്ന് ഒഴിവാകുമ്പോൾ മടങ്ങിയെത്തുമെന്നുമാണ് ഇതിനോട് ഭരതീയ കിസാൻ യൂനിയൻ പ്രതികരിച്ചത്.