Begin typing your search above and press return to search.
exit_to_app
exit_to_app
Farmers Protest
cancel
Homechevron_rightNewschevron_rightIndiachevron_rightകർഷക പ്രക്ഷോഭത്തിന്​...

കർഷക പ്രക്ഷോഭത്തിന്​ ഒരു വയസ്​; ഡൽഹി കനത്ത സുരക്ഷയിൽ, കർഷകരുടെ നേതൃത്വത്തിൽ വിവിധ പരിപാടികൾ നടക്കും

text_fields
bookmark_border

ന്യൂഡൽഹി: കേന്ദ്രസർക്കാറിനെയും ബി.ജെ.പിയെയും വിറപ്പിക്കുന്ന കർഷക പ്രക്ഷോഭം ആരംഭിച്ചിട്ട്​ ഒരു വർഷം. പ്രക്ഷോഭം ഒരു​ വർഷം തികക്കുന്നതിന്‍റെ ഭാഗമായി നിരവധി കർഷകർ ഡൽഹി അതിർത്തിക​ളി​​േലക്ക്​ ഒഴുകിയെത്തി.

കൂടുതൽ കർഷകർ രാജ്യതലസ്​ഥാനത്തേക്ക്​ എത്തിയതോടെ വിവിധ അതിർത്തികളിൽ ഡൽഹി പൊലീസ്​ സുരക്ഷ ശക്തമാക്കി. ഒരു വർഷം തികക്കുന്നതിന്‍റെ ഭാഗമായി നിരവധി പരിപാടികളാണ്​ കർഷകർ രാജ്യതലസ്​ഥാനത്ത്​ ആഹ്വാനം ചെയ്​തിരിക്കുന്നത്​.

ഡൽഹിയിലെ സിംഘു, ടിക്​രി, ഗാസിപൂർ അതിർത്തികളിലാണ്​ ഒരു വർഷമായി കർഷകർ തമ്പടിച്ചിരിക്കുന്നത്​. കേന്ദ്രസർക്കാറിന്‍റെ മൂന്ന്​ കാർഷിക നിയമങ്ങൾ പിൻവലിക്കണമെന്നായിരുന്നു കർഷകരുടെ പ്രധാന ആവശ്യം. 2020 നവംബർ 26-27 തീയതികളിൽ ആരംഭിച്ച 'ദില്ലി ചലോ' മാർച്ചിനോട്​ അനുബന്ധിച്ചായിരുന്നു പ്രക്ഷോഭത്തിൻറെ തുടക്കം. കർഷകർ പ്രക്ഷോഭത്തിൽനിന്ന്​ പിന്മാറാൻ തയാറാകാതെ വന്നതോടെ മൂന്ന്​ കാർഷിക നിയമങ്ങൾ പിൻവലിക്കുന്നതായി കേന്ദ്രസർക്കാർ അറിയിച്ചിരുന്നു.

40ഓളം കർഷക സംഘടനകളുടെ കൂട്ടായ്​മയായ സംയുക്ത കിസാൻ മോർച്ചയുടെ നേതൃത്വത്തിലാണ്​ പ്രക്ഷോഭം. ഇത്രയും നീണ്ട പ്രക്ഷോഭം നടത്തേണ്ടിവരുന്നത്​ അധ്വാനിക്കുന്ന പൗരന്മാരോടുള്ള കേന്ദ്രസർക്കാറിന്‍റെ നിർവികാരതയുടെയും ധാർഷ്​ട്യത്തിന്‍റെ പ്രതിഫലനമാണെന്ന്​ സംയുക്ത കിസാൻ മോർച്ച പറഞ്ഞു.

കേന്ദ്രസർക്കാർ കാർഷിക നിയമങ്ങൾ പിൻവലിച്ചതാണ്​ പ്രക്ഷോഭത്തിന്‍റെ ഏറ്റവും വലിയ വിജയമെന്ന്​ എസ്​.കെ.എം പ്രസ്​താവനയിൽ അറിയിച്ചു. കർഷകരുടെ മറ്റ്​ ആവശ്യങ്ങൾ അംഗീകരിക്കുന്നതിനായി കാത്തിരിക്കുകയാണെന്നും സംഘടന അറിയിച്ചു.

കർഷക പ്രക്ഷോഭം ഒരു വർഷം തികക്കുന്നതിന്‍റെ ഭാഗമായി വിവിധ സംസ്​ഥാനങ്ങളിലും പ്രക്ഷോഭ പരിപാടികൾ അരങ്ങേറും. കർണാടകയിൽ കർഷകർ പ്രധാന ദേശീയപാതകൾ ഉപരോധിക്കും. തമിഴ്​നാട്​, ബിഹാർ, മധ്യപ്രദേശ്​ എന്നിവിടങ്ങളിൽ ജില്ല ആസ്​ഥാനങ്ങളിൽ കർഷക സംഘടനകൾ സംയുക്ത പ്രതിഷേധം സംഘടിപ്പിക്കും. റായ്​പൂരിലും റാഞ്ചിയിലും ട്രാക്​ടർ റാലികൾ നടക്കും. പശ്ചിമ ബംഗാളിൽ കൊൽക്കത്തയിലും മറ്റെല്ലാ ജില്ലകളിലും റാലികൾ സംഘടിപ്പിക്കും.

പ്രക്ഷോഭം തുടരുന്ന ഡൽഹിയി​ൽ പൊലീസ്​, സുരക്ഷ ഉദ്യോഗസ്​ഥരെ കൂടുതലായി വിന്യസിച്ചു. അർധ സൈനിക സേനയും പ്രദേശത്ത്​ നിലയുറപ്പിച്ചിട്ടുണ്ട്​.

Show Full Article
TAGS:Farmers Protest Farm Law 
News Summary - farmers protest completes one year Security beefed up at Delhis borders
Next Story