കർഷക സമരത്തെ അടിച്ചമർത്താൻ എൻ.ഐ.എയും; പ്രക്ഷോഭത്തെ പിന്തുണച്ചവർക്ക്​ നോട്ടീസ്​

ന്യൂഡൽഹി: കാർഷിക നിയമങ്ങൾക്കെതിരെ പ്രതിഷേധിക്കുന്ന കർഷക​െര നിശബ്​ദമാക്കാൻ കേന്ദ്രസർക്കാർ നാഷനൽ ഇൻവെസ്റ്റിഗേഷൻ ഏജൻസി(എൻ.ഐ.എ)യെ ആയുധമാക്കുന്നുവെന്ന്​ കർഷകർ. പ്രക്ഷോഭത്തെ പിന്തുണച്ചവർക്ക്​ എൻ.ഐ.എ നോട്ടീസ്​ അയച്ചിരിക്കുകയാണെന്ന്​ കർഷകർ പറഞ്ഞു.

കേന്ദ്രസർക്കാറും കർഷകരും തമ്മിൽ ഡൽഹിയിലെ വിഗ്യാൻ ഭവനിൽ നടത്തിയ ഒമ്പതാംഘട്ട ചർച്ചയിൽ കർഷകർ ഇക്കാര്യം ഉയർത്തിക്കാട്ടിയിട്ടുണ്ട്​.

സമരത്തിനിടെ മരിച്ച കർഷകരുടെ കുടുംബത്തിനും കർഷക സംഘടനകൾക്കും ഫണ്ട്​ കൈമാറിയവർക്ക്​​ എൻ.ഐ.എ നോട്ടീസ്​ അയച്ചിരിക്കുകയാണെന്ന്​ രാഷ്​ട്രീയ കിസാൻ മഹാസംഘ്​ നേതാവ്​ അഭിമന്യൂ കോഹർ 'ദ ക്വിന്‍റ്​' ഓ​ൺ​ൈലനിനോട്​ പറഞ്ഞു.

ചർച്ചയിൽ ഈ വിഷയം ഉയർത്തികൊണ്ടുവന്നതായും വിയോജിപ്പുകൾ പരിഹരിക്കാൻ സർക്കാർ ആഗ്രഹിക്കുന്നതായി കേന്ദ്രം പറഞ്ഞതായും അദ്ദേഹം കൂട്ടിച്ചേർത്തു.

യു.എസ്​ ആസ്​ഥാനമായി പ്രവർത്തിക്കുന്ന സിഖ്​ ഫോർ ജസ്റ്റിസുമായി ബന്ധമുള്ള പഞ്ചാബ്​ സ്വദേശികൾക്കെതിരെയാണ്​ എൻ.ഐ.എ ​എഫ്​.ഐ.ആർ രജിസ്​റ്റർ ചെയ്​തത്​. ഇതിൽ വിനോദ യാത്ര ബസ്​ ഓപ്പ​േററ്റർ, ചെറുകിട വ്യവസായികൾ, കേബ്​ൾ ടി.വി ഒാപ്പറേറ്റർമാർ തുടങ്ങിയവർ ഉൾപ്പെടും. കൂടാതെ മാധ്യമപ്രവർത്തകർക്കും എൻ.ജി.ഒകളിൽ പ്രവർത്തിക്കുന്നവർക്കും​ നോട്ടീസ്​ അയച്ചിട്ടുണ്ട്​.

യു.എസിൽനിന്നുള്ള ഗുർപത്​വന്ത്​ സിങ്​ പന്നു, യു.കെ ആസ്​ഥാനമായി പ്രവർത്തിക്കുന്ന പരംജീത്​ സിങ് പമ്മ, കാനഡയിലെ ഹർദീപ്​ സിങ്​ നിജ്ജാർ എന്നിവർക്കെതിരെയാണ്​ ഡിസംബർ 15ന്​ ഡൽഹിയിൽ എഫ്​.ഐ.ആർ രജിസ്റ്റർ​ ചെയ്​തത്​. സിഖ്​ ഫോർ ജസ്റ്റിസിന്‍റെ തലവനാണ്​ പന്നു.

സിഖ്​ ഫോർ ജസ്റ്റിസ്​, മറ്റ്​ ഖലിസ്​ഥാനി തീവ്രവാദി സംഘടനകൾ ഉൾപ്പെടെ കർഷക പ്രക്ഷോഭത്തിലേക്ക്​ നുഴഞ്ഞുകയറിയതായി കേന്ദ്രസർക്കാറിന്​ വിവരം ലഭിച്ചു. ഇത്തരം സംഘടനകൾ ഭയാന്തരീക്ഷം സൃഷ്​ടിക്കുകയും ജനങ്ങളെ അസംതൃപ്​തരാക്കുകയും ഇന്ത്യൻ സർക്കാറിനെതിരെ കലാപത്തിന്​ പ്രോത്സാഹിപ്പിക്കുന്നുവെന്നും ആരോപിച്ചാണ്​ എഫ്​.ഐ.ആർ. കൂടാതെ വിദേശത്തുനിന്ന്​ ഫണ്ട്​ ശേഖരിക്കുന്നുവെന്നും എഫ്​.ഐ.ആറിൽ പറയുന്നു.

പ്രക്ഷോഭത്തിൽ ഖലിസ്​ഥാനികൾ നുഴഞ്ഞുകയറിട്ടുണ്ടെന്ന്​ അറ്റോർണി ജനറൽ മുഖേന കേന്ദ്രം സുപ്രീംകോടതിയെ അറിയിച്ചതിന്​ പിന്നാലെയാണ്​ പുതിയ നീക്കം. ഖലിസ്​ഥാനികൾക്കെതിരായി പ്രവർത്തിച്ച കർഷകരെ കേന്ദ്രം അപമാനിക്കുകയാണെന്ന്​ കർഷക സംഘടനകൾ പറഞ്ഞു. കേന്ദ്രം എൻ.ഐ.എയെ ഉപയോഗിച്ച്​ കർഷകരെ ഉപദ്രവിക്കുകയാണെന്ന്​ ശിരോമണി അകാലിദൾ കൂട്ടിച്ചേർത്തു. അതേസമയം, കർഷക സമരത്തിന്​ ഐക്യദാർഢ്യം പ്രഖ്യാപിച്ച്​ തുക കൈമാറിയ സംഘടനകളെല്ലാം ഖാലിസ്​ഥാനികൾക്കെതിരെ നിലപാടുകൾ സ്വീകരിച്ചവരാണെന്നും കർഷക സംഘടനകൾ പറഞ്ഞു.