Begin typing your search above and press return to search.
exit_to_app
exit_to_app
Amarinder Singh
cancel
Homechevron_rightNewschevron_rightIndiachevron_rightകർഷക പ്രക്ഷോഭം...

കർഷക പ്രക്ഷോഭം പഞ്ചാബിന്​ നഷ്​ടമുണ്ടാക്കുന്നു; ഡൽഹിയിലോ ഹരിയാനയിലോ പ്രതിഷേധിക്കണമെന്ന്​ പഞ്ചാബ്​ മുഖ്യമന്ത്രി

text_fields
bookmark_border

അമൃത്​സർ: കേന്ദ്രസർക്കാറിന്‍റെ കാർഷിക നിയമങ്ങൾക്കെതിരെ പ്രതിഷേധിക്കുന്ന കർഷകർ സംസ്ഥാനത്തിന്​ സാമ്പത്തിക നഷ്​ടമുണ്ടാക്കുന്നുവെന്നും ഡൽഹിയിലോ ഹരിയാനയിലോ പോയി സമരം ചെയ്യണമെന്നും പഞ്ചാബ്​ മുഖ്യമന്ത്രി ക്യാപ്​റ്റൻ അമരീന്ദർ സിങ്​. പഞ്ചാബിന്‍റെ താൽപര്യത്തിന്​ അനുസരിച്ചല്ല കർഷക സമരം. സംസ്​ഥാനത്ത്​ സമരം അവസാനിപ്പിച്ച്​ ഡൽഹിയ​ിലോ ഹരിയാനയിലോ പോയി പ്രതിഷേധിക്കണം -അമരീന്ദർ സിങ്​ ആവശ്യപ്പെട്ടു.

സംസ്​ഥാനത്ത്​ 113 സ്​ഥലങ്ങളിലാണ്​ കർഷകരുടെ പ്രതിഷേധം. ഈ പ്രതിഷേധങ്ങൾ സംസ്​ഥാനത്തിന്​ സാമ്പത്തിക നഷ്​ടമുണ്ടാക്കു​ന്നുവെന്നാണ്​ അമരീന്ദർ സിങ്ങിന്‍റെ അഭിപ്രായം. മുഖിലാനയിലെ ഗവൺമെന്‍റ്​ കോളജിന്‍റെ ശിലാസ്​ഥാപനം നിർവഹിച്ച ശേഷം സംസാരിക്കുകയായിരുന്നു അദ്ദേഹം.

'കർഷകർക്ക്​ ധർണ നടത്തണമെങ്കിൽ പഞ്ചാബിന്​ പകരം ഹരിയാനയിലേക്കോ ഡൽഹിയിലേക്കോ പോകണം' -അമരീന്ദർ സിങ്​ പറഞ്ഞു.

സംസ്​ഥാന സർക്കാറും ജന​ങ്ങളും പ്രതിഷേധിക്കുന്ന കർഷ​കരോട്​ ഐക്യദാർഢ്യം പ്രഖ്യാപിച്ചതിനാൽ പഞ്ചാബിൽ പ്രക്ഷോഭം സംഘടിപ്പിക്കരുതെന്നും അദ്ദേഹം ആവശ്യപ്പെട്ടു​. കർഷകരുടെ ആവശ്യ​ങ്ങൾ അംഗീകരിക്കുന്നതിൽ കേന്ദ്രം കാലതാമസം വരുത്തുന്നതിൽ മുഖ്യമന്ത്രി ആശങ്ക പ്രകടിപ്പിക്കുകയും ചെയ്​തു. കേന്ദ്രസർക്കാറിൽ സമ്മർദ്ദം ചെലുത്തുന്നതിനായി പഞ്ചാബിൽനിന്ന്​ മാറി മറ്റിടങ്ങളിൽ സമരം ചെയ്യുകയാണ്​ വേണ്ടതെന്നും അദ്ദേഹം നിർദേശിച്ചു.

കേന്ദ്രസർക്കാറിന്‍റെ കാർഷിക നിയമങ്ങളുമായി ബന്ധ​െപ്പട്ട്​ ശിരോമണി അകാലിദൾ കർഷകരെ കബളിപ്പിക്കുകയാണെന്ന് ​ആരോപിച്ച മുഖ്യമ​ന്ത്രി അകാലിദളിന്‍റെ സമ്മതത്തോടെയാണ്​ നിയമങ്ങൾ തയാറാ​ക്കിയതെന്നും​ പറഞ്ഞു. കൂടാതെ ഹർസിമ്രത്​ കൗർ ബാദൽ, മുൻ മുഖ്യമന്ത്രി പ്രകാശ്​ സിങ് ബാദലും ആദ്യം നിയമത്തെ അംഗീകരിച്ചിരുന്നുവെന്നും പിന്നീട്​ യു ടേൺ തിരിയുകയായിരുന്നുവെന്നും ​മുഖ്യമന്ത്രി കൂട്ടിച്ചേർത്തു.

1950ന്​ ശേഷം 127 തവണ ഭരണഘടന ഭേദഗതി ചെയ്​തു. അതിനാൽ ഒരിക്കൽ കുടി കാർഷിക നിയമങ്ങൾ എടുത്തുകളഞ്ഞ്​ സിംഘു, ടിക്​രി അതിർത്തികളിൽ പ്രതിഷേധിക്കുന്ന കർഷകരെ സഹായിക്കണമെന്നും അമരീന്ദർ പറഞ്ഞു. പ്രക്ഷോഭത്തിനിടെ മരിച്ച ഓരോ കർഷകന്‍റെയും കുടുംബത്തിന്​ പഞ്ചാബ്​ സർക്കാർ അഞ്ചുലക്ഷം രൂപ നൽകിയെന്നും അദ്ദേഹം കൂട്ടിച്ചേർത്തു.

അതേസമയം മുഖ്യമന്ത്രിയുടെ​ പ്രസ്​താവനക്കെതിരെ ഹരിയാന മുഖ്യമന്ത്രി അനിൽ വിജ്​ രംഗത്തെത്തി. പ്രക്ഷോഭത്തിനായി പഞ്ചാബ്​ കർഷകരെ പ്രേരിപ്പിക്കുന്നുവെന്നായിരുന്നു അനിൽ വിജിന്‍റെ ആരോപണം.

Show Full Article
TAGS:Amarinder Singh Farmers Protest Punjab 
News Summary - farmers Dont Protest in Punjab Go to Delhi or Haryana Captain Amarinder
Next Story