അസം വ്യാജ ഏറ്റുമുട്ടൽ കൊല: മേജർ അടക്കം ഏഴു പേർക്ക്​ ജീവപര്യന്തം

ഗുവാഹതി/ന്യൂഡൽഹി: വ്യാജ ഏറ്റുമുട്ടൽ കൊല നടത്തിയ കേസിൽ ​മേജർ ജനറൽ, രണ്ട്​ കേണലുകൾ, നാല്​ പട്ടാളക്കാർ എന്നിവർക്ക്​​ പട്ടാളക്കോടതി ജീവപര്യന്തം​ ശിക്ഷ വിധിച്ചു. 1994ൽ അസമിലെ ദിബ്രുഗഢിൽ ഒാൾ അസം സ്​റ്റുഡൻറ്​സ്​ യൂനിയൻ പ്രവർത്തകരായ അഞ്ചുപേരെ വധിച്ച കേസിലാണ്​ വിധി.

അസമിലെ രണ്ട്​ ഇൻഫൻററി മൗണ്ടൻ ഡിവിഷനിൽ മേജർ ജനറലായിരുന്ന എ.കെ. ലാൽ, കേണലുമാരായ തോമസ്​ മാത്യു, ആർ.എസ്​. സിബിരൻ, പട്ടാളക്കാരായ ദിലീപ്​ സിങ്​, ജഗ്​ദിയോ സിങ്​, അൽബിന്ദർ സിങ്​, ശിവശങ്കർ സിങ്​ എന്നിവർക്കാണ്​ ജീവപര്യന്തം തടവുശിക്ഷ വിധിച്ചത്​.

ഇതിൽ മേജർ ജനറൽ എ.കെ. ലാലിനെ ഒരു വനിതാ പട്ടാള ഒാഫിസറുടെ പരാതിയെത്തുടർന്ന്​ 2010ൽ സർവിസിൽനിന്ന്​ പിരിച്ചുവിട്ടിരുന്നു. പ്രതികൾക്ക്​ വിധിക്കെതിരെ ആംഡ്​ ഫോഴ്​സ്​ ട്രൈബ്യൂണലിലോ സുപ്രീംകോടതിയിലോ അപ്പീൽ നൽകാം​.

ഒാൾ അസം സ്​റ്റുഡൻറ്​സ്​ യൂനിയൻ പ്രവർത്തകരായ പ്രബിൻ സോണോവാൾ, പ്രദീപ്​ ദത്ത, ദേബാജിത്ത്​ ബിസ്വാസ്​, അഖിൽ സോണോവാൾ, ഭ​ാബെൻ ​േമാറാൻ എന്നിവരെയാണ്​ വ്യാജ ഏറ്റുമുട്ടലിലൂടെ വധിച്ചത്​. 1994 ഫെബ്രുവരി 17 മുതൽ 19 വരെയുള്ള ദിവസങ്ങളിലാണ്​ അസമിലെ തിൻസുകിയ ജില്ലയിലെ വിവിധയിടങ്ങളിൽ​െവച്ച്​ ഇവർ കൊല്ലപ്പെട്ടത്​.

അസമിലെ തലാപ്​ ടീ എസ്​റ്റേറ്റിലെ അസം ഫ്രോണ്ടിയർ ടീ കമ്പനി ജനറൽ മാനേജർ രാമേശ്വർ സിങ്ങിനെ ഉൾഫ തീ​വ്രവാദികൾ വധിച്ചതിനെ തുടർന്നാണ്​ വിദ്യാർഥി യൂനിയൻ പ്രവർത്തകരെ പട്ടാളത്തി​​​​െൻറ നേതൃത്വത്തിൽ വ്യാജ എറ്റുമുട്ടലിലൂടെ വധിച്ചത്​. സംഭവത്തിൽ അന്നത്തെ ഒാൾ അസം സ്​റ്റുഡൻറ്​സ്​ യൂനിയൻ വൈസ്​ പ്രസിഡൻറും ഇന്നത്തെ ബി.ജെ.പി നേതാവുമായ ജഗ്​ദീഷ്​ ഭുയാൻ ഗുവാഹതി ഹൈകോടതിയെ സമീപിച്ചതിനെ തുടർന്ന്​ കോടതി ​സി.ബി.​െഎ അന്വേഷണത്തിന്​ ഉത്തരവിട്ടിരുന്നു. തുടർന്ന്​ നടന്ന അന്വേഷണത്തിൽ പ്രതികൾക്കെതിരെ സി.ബി.​െഎ കേസെടുത്ത്​ കുറ്റപത്രം സമർപ്പിച്ചതി​​​​െൻറ അടിസ്​ഥാനത്തിൽ സൈനികകോടതി പ്രത്യേക വിചാരണക്കായി കേസ്​ ഏറ്റെടുക്കുകയായിരുന്നു.