അതിർത്തി പ്രശ്​നം: മോദിക്ക്​ പിന്തുണയുമായി വ്യാജ ട്രംപും നെതന്യാഹുവും ട്വിറ്ററിൽ; പങ്കുവെച്ച് കുടുങ്ങി​ പ്രമുഖർ

ന്യൂഡൽഹി: അതിർത്തിയിൽ നിലനിൽക്കുന്ന ഇന്ത്യ-ചൈന പ്രശ്​നം ഏറ്റവും കൂടുതൽ പ്രതിസന്ധി തീർത്തിരിക്കുന്നത്​ സോഷ്യൽ മീഡിയയിൽ ആണ്​. യുദ്ധത്തിലേക്ക്​ പോവാതെ പ്രശ്​നപരിഹാരത്തിനുള്ള തീവ്രശ്രമങ്ങൾ തുടരവേ, ട്വിറ്ററിലും ഫേസ്​ബുക്കിലും ഇന്ത്യയുടെ ഏറ്റവും വലിയ ശത്രുവായ ചൈനയുമായി യുദ്ധത്തിനുള്ള ആഹ്വാനവുമായി ചിലർ രംഗത്തുണ്ട്​. അമേരിക്കയും ഇസ്രയേലും ഇന്ത്യൻ ​പ്രധാനമന്ത്രി നരേന്ദ്ര മോദിക്കൊപ്പമാണെന്നും യുദ്ധം വന്നാൽ ഇന്ത്യ ജയിക്കുമെന്നുമൊക്കെ ​പ്രചരിപ്പിക്കുന്നവർ കുറവല്ല​. 

അതിനോടൊപ്പം, ഇന്ത്യക്ക് പൂർണ്ണ പിന്തുണ അറിയിച്ചുകൊണ്ടുള്ള അമേരിക്കൻ പ്രസിഡൻറ്​ ഡോണൾഡ്​ ട്രംപ്​, മകൻ  ഇവാൻക ട്രംപ്​, ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു എന്നിവരുടെ ട്വീറ്റുകളും പങ്കുവെക്കുന്നുണ്ട്​. എന്നാൽ, എല്ലാം ട്വിറ്റർ വെരിഫൈ ചെയ്യാത്ത വ്യാജ പ്രൊഫൈലുകളിൽ നിന്നുള്ള ട്വീറ്റുകളാണ്​. ഇവാൻക്​ ട്രംപി​​െൻറ വ്യാജ പ്രൊഫൈലിൽ നിന്നും ഇത്തരത്തിൽ വന്ന ട്വീറ്റിന്​ ലഭിച്ചത്​ പതിനായിരക്കണക്കിന്​ ലൈക്കുകളായിരുന്നു. അതിലേറെ പേർ അത്​ ഷെയർ ചെയ്യുകയും ചെയ്​തിട്ടുണ്ട്​. ‘ഞാൻ ഇന്ത്യയോടൊപ്പം നിൽക്കും’ എന്നായിരുന്നു ഇവാൻകയുടെ  ട്വീറ്റ്​.

രാഷ്​ട്രീയ നേതാക്കൾ അടക്കം നിരവധി പ്രമുഖരാണ്​ വ്യാജ പ്രൊഫൈലുകളിൽ നിന്നും വന്ന ട്വീറ്റുകൾ പരിശോധിക്കാതെ പങ്കുവെച്ചത്​. ബി.ജെ.പി എം.പിയും മുൻ മന്ത്രിയുമായ സുബ്രഹ്മണ്യൻ സ്വാമി നെതന്യാഹുവി​​െൻറ ട്വീറ്റാണ്​ ഷെയർ ചെയ്​തത്​. ബി.ജെ.പിയുടെ ദേശീയ തലത്തിലുള്ള സോഷ്യൽ മീഡിയ ചുമതലയുള്ള പ്രിതി ഗാന്ധിയും ഇത്തരത്തിൽ അബദ്ധം പിണഞ്ഞവരിൽ പെടും. ഇവാൻകയുടെ ട്വീറ്റ്​ പങ്കുവെച്ചുകൊണ്ട്​ ‘ഇന്ത്യ ഇതിനെ അഭിനന്ദിക്കുന്നു’ എന്നായിരുന്നു മഹിള മോർച്ച നേതാവ്​ ട്വിറ്ററിൽ കുറിച്ചത്​. ഇതിന്​ പിന്നാലെ പ്രിതി ഗാന്ധിയെ തിരുത്തിക്കൊണ്ട്​ നിരവധി പേരാണ്​ എത്തിയത്​. ഇത്തരത്തിൽ ലോകനേതാക്കളുടെ പേരിൽ ട്വിറ്ററിൽ നിരവധി വ്യാജ പ്രൊഫൈലുകളാണ്​ പ്രചരിക്കുന്നത്​. 

ഇന്തോ-ചൈന അതിർത്തി പ്രശ്​നവുമായി ബന്ധപ്പെട്ട്​, മോദി കഴിവുകെട്ട പ്രധാനമന്ത്രിയാണെന്ന അർഥത്തിൽ  ട്വിറ്ററിൽ ModiweakestPM എന്ന ഹാഷ്​ടാഗ് കഴിഞ്ഞ ദിവസം പ്രചരിച്ചിരുന്നു. ഇതിനെ മറികടക്കാനായി മോദിയെ അനുകൂലിച്ചുകൊണ്ടുള്ള ഹാഷ്​ടാഗുകളുമായി ചിലരെത്തി. കൂടെ ലോകനേതാക്കളുടെ വ്യാജ അക്കൗണ്ടുകളിൽ നിന്നുമുള്ള ട്വീറ്റുകളും പങ്കുവെച്ചിട്ടുണ്ടായിരുന്നു.  ട്വിറ്ററിലും ഫേസ്​ബുക്കിലും ബോയ്​കോട്ട്​ ചൈന ഹാഷ്​ടാഗുകളും തരംഗമാവുന്നുണ്ട്​. എല്ലാവരും ചൈനീസ്​ നിർമിത വസ്​തുക്കൾ ഉപേക്ഷിക്കാനും ചൈന നിർമിച്ച ടിക്​ടോക്​ പോലുള്ള ആപ്പുകൾ ഫോണുകളിൽ നിന്ന്​ നീക്കം ചെയ്യാനുമാണ്​ ആഹ്വാനം​.