യു.പി വിധാൻ സഭയിൽ സ്​ഫോടക വസ്​തു; എൻ.​െഎ.എ അന്വേഷിക്കണമെന്ന്​ യോഗി

ലഖ്​നോ: ഉത്തർപ്രദേശ്​ നിയമസഭയിൽ നിന്നും ​കണ്ടെടുത്ത പൊടി സ്​ഫോടക വസ്​തുവാണെന്ന്​ സ്ഥിരീകരിച്ചു. ജൂലൈ 12 നാണ്​ വിധാൻ സഭക്കുള്ളിൽ നിന്ന്​ സംശയാസ്​പദമായ പൊതി കണ്ടെടുത്തത്​. ഫോറൻസിക്​ പരിശോധനയിൽ ഇത്​ ഉഗ്ര സ്​ഫോടന ശേഷിയുള്ള വസ്​തുവായ പ​​​​െൻറായിത്രോൾ ടെട്രാനിട്രേറ്റ്​ (പി.ഇ.ടി.എൻ)ആണെന്ന്​ സ്ഥിരീകരിച്ചു. 

ബുധനാഴ്​ച വിധാൻ സഭ സമ്മേളനം നടന്നുകൊണ്ടിരിക്കെയാണ്​ പ്രതിപക്ഷ നേതാവ്​ രാം ഗോവിന്ദ്​ ചൗധരിയു​ടെ സീറ്റിനടിയിൽ നിന്നും ഡോഗ്​ സ്വകാഡ്​ പൊതി കണ്ടെത്തിയത്​. ഇതിൽ 60 ഗ്രാം സ്​ഫോടക വസ്​തുവാണ്​ ഉണ്ടായിരുന്നത്​. തുടർന്ന്​ വിധാൻ സഭക്ക്​ സുരക്ഷാ സേന ശക്തമായ കാവൽ ഏർപ്പെടുത്തിയിരുന്നു. 

സഭക്കുള്ളിൽ നിന്ന്​ സ്​ഫോടക വസ്​തു കണ്ടെത്തിയ സംഭവത്തിൽ ദേശീയ അന്വേഷണ ഏജൻസി (എൻ.​െഎ.എ) അന്വേഷണം നടത്തണമെന്ന്​ മുഖ്യമന്ത്രി യോഗി ആദിത്യനാഥ്​ ആവശ്യപ്പെട്ടു. സുരക്ഷ പരമപ്രധാനമാണെന്നും അന്വേഷണം ഉടൻ പൂർത്തിയാക്കണമെന്നും യോഗി സഭയിൽ ആവശ്യപ്പെട്ടു. സംഭവത്തെ തുടർന്ന്​ മുഖ്യമന്ത്രി ഉന്നത തല യോഗം വിളിച്ചിട്ടുണ്ട്​. 

സ്​ഫോടക വസ്​തു എങ്ങനെ നിയമ സഭക്കുള്ളിലെത്തി എന്നത്​ അന്വേഷിക്കണമെന്ന്​ സമാജ്​വാദി പാർട്ടി ആവശ്യപ്പെട്ടു. വിധാൻ സഭയിൽ പോലും സുരക്ഷയില്ലെങ്കിൽ സംസ്ഥാനത്തിലെ മറ്റ്​ സ്ഥാപനങ്ങളുടെയും ജനങ്ങളുടെയും കാര്യം എങ്ങനെയാവുമെന്നത്​ ഉൗഹിക്കാവുന്നതേ ഉള്ളൂയെന്നും എസ്​.പി നേതാവ്​ രാജേന്ദ്ര ചൗധരി പറഞ്ഞു. 

100 ഗ്രാം പി.ഇ.ടി.എന്നിന്​ ഒരു കാറിനെ നാമ​വശേഷമാക്കാൻ കഴിയും. സെംടെക്​സ്​ ബോംബുകളുണ്ടാക്കുന്നതിൽ പ്രധാന ചേരുവയാണിത്​.