എല്ലാവർക്കും ആഗ്രഹിക്കുന്ന വകുപ്പുകൾ ലഭിക്കില്ലെന്ന്​ കർണാടക മുഖ്യമന്ത്രി

ബംഗളൂരു: എല്ലാവർക്കും ആഗ്രഹിക്കുന്ന വകുപ്പുകൾ തന്നെ നൽകാൻ കഴിയില്ലെന്ന്​ കർണാടക മുഖ്യമന്ത്രി ബസവരാജ്​ ബൊമ്മെ . മന്ത്രിസ്ഥാനങ്ങളിൽ ചിലർക്ക്​ അതൃപ്​തിയുണ്ടെന്ന റിപ്പോർട്ടുകൾക്ക്​ പിന്നാലെയാണ്​ ബസവരാജ്​ ബൊമ്മെയുടെ വിശദീകരണം.

എല്ലാവർക്കും ആഗ്രഹിക്കുന്ന മന്ത്രിസ്ഥാനം നൽകാനാവില്ല. അനന്ദ്​ സിങ്​ എന്‍റെ അടുത്തയാളാണ്​. ഞാൻ വിളിച്ച്​ സംസാരിച്ചാൽ പ്രശ്​നങ്ങളെല്ലാം തീരുമെന്നും അദ്ദേഹം പറഞ്ഞു. മന്ത്രിസ്ഥാനത്തിൽ അതൃപ്​തി പ്രകടിപ്പിച്ച്​ ആനന്ദ്​ സിങ്​ രംഗത്തെത്തിയിരുന്നു.

പരിസ്ഥിതി, ടൂറിസം വകുപ്പുകളാണ്​ ആനന്ദ്​ സിങ്ങിന്​ നൽകിയത്​. എന്നാൽ, താൻ ഈ വകുപ്പകളല്ല ചോദിച്ചതെന്നും മുഖ്യമന്ത്രിയെ കാണാൻ പോവുകയാണെന്നും ആനന്ദ്​ സിങ്​ വ്യക്​തമാക്കിയിരുന്നു. മന്ത്രിസ്ഥാനം ലഭിക്കാത്തതിൽ ചില എം.എൽ.എമാർക്ക്​ ഇപ്പോഴും അതൃപ്​തിയുണ്ടെന്ന റിപ്പോർട്ടുകളും കർണാടകയിൽ നിന്നും പുറത്ത്​ വരുന്നുണ്ട്​.