922 കോടി ചെലവിൽ പുതിയ പാർലമെൻറ്​ മന്ദിരം നിർമിക്കാൻ പരിസ്ഥിതി മന്ത്രാലയത്തി​െൻറ അനുമതി

ന്യൂഡൽഹി: നിലവിലുള്ള കെട്ടിടത്തിന്​ സമീപം 922 കോടി രൂപ ചെലവിൽ പുതിയ പാർലമ​െൻറ്​ മന്ദിരം നിർമിക്കാൻ ​േകന്ദ്ര പരിസ്ഥിതി മന്ത്രാലയം അനുമതി നൽകി. 10.5 ഏക്കർ സ്ഥലത്ത് 65,000 ചതുരശ്ര മീറ്റർ വിസ്ത​ൃതിയിലാണ്​ കെട്ടിടം നിർമിക്കുക. 42 മീറ്റർ ഉയരമുണ്ടാകും. 

പരിസ്ഥിതി മന്ത്രാലയത്തി​​െൻറ വിദഗ്ദ്ധ മൂല്യനിർണയ സമിതി (ഇ.എ.സി) കഴിഞ്ഞ ആഴ്ച ചേർന്ന യോഗത്തിലാണ്​ പദ്ധതിക്ക്​ അംഗീകാരം നൽകിയത്​. കേന്ദ്ര പൊതുമരാമത്ത് വകുപ്പ്​ (സി‌.പി.‌ഡബ്ല്യു.ഡി) നൽകിയ ​നിർമാണ പ്രോജക്​റ്റ്​ ഫെബ്രുവരി 25 മുതൽ 26 വരെ നടന്ന യോഗങ്ങളിൽ ഇ.എ.സി പരിഗണിച്ചിരുന്നു. തുടർന്ന്​​ പദ്ധതിയുടെ വിശദാംശങ്ങൾ സമർപ്പിക്കാൻ സി‌.പി.‌ഡബ്ല്യു.ഡിയോട്​ ആവശ്യപ്പെട്ടു.​ ഇതനുസരിച്ചാണ്​ ഏപ്രിൽ 22 മുതൽ 24 വരെ നടന്ന യോഗം അനുമതി നൽകിയത്​. നേരത്തെ 776 കോടിയായിരുന്നു നിർമാണച്ചെലവായി കണക്കാക്കിയിരുന്നത്​. പുതിയ റിപ്പോർട്ട്​ പ്രകാരം ഇത്​  922 കോടി രൂപയായി ഉയർന്നു. 

നിലവിലുള്ള പാർലമ​െൻറ്​ മന്ദിരത്തി​​െൻറ സ്വീകരണ കേന്ദ്രവും എ.സി പ്ലാൻറും ഉൾപ്പെടെ 1970 -80കളിൽ നിർമ്മിച്ച 5,200 ചതുരശ്ര മീറ്റർ വിസ്തീർണ്ണമുള്ള കെട്ടിടങ്ങൾ പൊളിക്കും. നിർമാണ സ്​ഥലത്തുള്ള 333 മരങ്ങളിൽ 223 വൃക്ഷത്തൈകൾ പറിച്ചുനടുകയും 100 എണ്ണം നിലനിർത്തുകയും ചെയ്യും. പുതുതായി 290 മരങ്ങൾ നടാനും പരിസ്​ഥിതി മന്ത്രാലയം നിർദേശിച്ചു.

അതേസമയം, ഭൂവിനിയോഗം സംബന്ധിച്ച നിയമപരമായ തടസ്സങ്ങൾ നീക്കിയാൽ മാത്രമേ നിർമാണത്തിന്​ അന്തമാനുമതി ലഭിക്കുകയുള്ളൂ. എന്നാൽ, ഭൂവിനിയോഗത്തിന്​ സ്റ്റേ ഓർഡർ ഇല്ലെന്ന് സി.പി.ഡബ്ല്യു.ഡി വ്യക്തമാക്കി. മാസ്റ്റർ പ്ലാനിൽ വിനോദ കേന്ദ്രമായി രേഖപ്പെടുത്തിയ സ്​ഥലത്താണ്​ കെട്ടിടം നിർമിക്കുന്നത്​. ഇതുസംബന്ധിച്ച്​ ഭവന, നഗരകാര്യ മന്ത്രാലയത്തി​​െൻറ വിജ്ഞാപനം സുപ്രീം കോടതിയിൽ ചോദ്യം ചെയ്യപ്പെട്ടിരുന്നു.