മാനസികാരോഗ്യ കേന്ദ്രങ്ങളിലെ മുഴുവൻ പേർക്കും ഉടൻ വാക്​സിൻ നൽകണം -സുപ്രീംകോടതി

ന്യൂഡൽഹി: മാനസികാരോഗ്യ കേന്ദ്രങ്ങളിൽ കഴിയുന്നവരെ കോവിഡ്​ പരിശോധനക്ക്​ വിധേയരാക്കണമെന്നും മുഴുവൻ പേർക്കും എത്രയും പെ​ട്ടെന്ന്​ വാക്​സിൻ നൽകണമെന്നും കേന്ദ്ര - സംസ്​ഥാന സർക്കാറുകളോട്​ സുപ്രീംകോടതി.

മാനസികാരോഗ്യ കേന്ദ്രങ്ങളിലെ അന്തേവാസികളെ ഭിക്ഷാടകരെ പാർപ്പിക്കുന്ന കേന്ദ്രങ്ങളിലേക്ക്​ മാറ്റിയ മഹാരാഷ്​ട്ര സർക്കാറി​‍െൻറ നടപടിയെ കോടതി വിമർശിച്ചു. ഇത്​ മാനസികാരോഗ്യ നിയമത്തിന്​ എതിരാണെന്നും ഉടൻ അവസാനിപ്പിക്കണമെന്നും ജസ്​റ്റിസ്​ ഡി.വൈ. ചന്ദ്രചൂഡ്​, ജസ്​റ്റിസ്​ എം.ആർ. ഷാ എന്നിവരടങ്ങിയ ബെഞ്ച്​ ആവശ്യപ്പെട്ടു.

രോഗം ഭേദമായിട്ടും മാനസികാരോഗ്യ കേന്ദ്രങ്ങളിൽ കഴിയുന്നവരും ഇപ്പോഴും ചികിത്സ വേണ്ടവരുമായവരുടെ കണക്കുകളിലെ അപാകത ഉടൻ പരിഹരിക്കണം. സുപ്രധാന വിഷയമായതിനാൽ ഇത്​ ഗൗരവതരമായി എടുക്കുകയാണ്​. മൂന്നാഴ്​ചക്കുശേഷം കേസ്​ വീണ്ടും പരിഗണിക്കുമെന്നും കോടതി പറഞ്ഞു.

രോഗം ഭേദമായിട്ടും സാമൂഹിക ബഹിഷ്​കരണം ഭയന്ന്​ പതിനായിരത്തോളം പേർ രാജ്യത്തെ മാനസികാരോഗ്യ കേന്ദ്രങ്ങളിൽ കഴിയുകയാണെന്ന്​ ചൂണ്ടിക്കാട്ടി അഭിഭാഷകനായ ഗൗരവ്​ ബൻസൽ സമർപ്പിച്ച ഹരജി പരിഗണിക്കുകയായിരുന്നു കോടതി.