കോൺഗ്രസ്​ പ്രസിഡൻറ്​ തെര​​ഞ്ഞെടുപ്പ്​ അടുത്ത വർഷം സെപ്​റ്റംബറിൽ നടന്നേക്കും

ന്യൂഡൽഹി: കോൺഗ്രസ്​ പ്രസിഡൻറ്​ തെരഞ്ഞെടുപ്പ്​ അടുത്ത വർഷം സെപ്​റ്റംബറിൽ നടന്നേക്കുമെന്ന്​ റിപ്പോർട്ട്​. കോൺഗ്രസ്​ പ്രവർത്തകസമിതി യോഗത്തിൽ ഇതുസംബന്ധിച്ച്​ ധാരണയായെന്നാണ്​ വാർത്തകൾ. അശോക്​ ഗെഹ്​ലോട്ട്​ രാഹുൽ ഗാന്ധിയുടെ പേര്​ അധ്യക്ഷപദത്തിലേക്ക്​ നിർദേശിച്ചുവെന്ന റിപ്പോർട്ടുകളും പുറത്ത്​ വരുന്നുണ്ട്​. എന്നാൽ, വാർത്തകൾക്ക്​ സ്ഥിരീകരണം നൽകാൻ കോൺഗ്രസ്​ നേതൃത്വം തയാറായിട്ടില്ല.

നേരത്തെ കോൺഗ്രസ്​ നേതൃത്വത്തിനെതിരെ നേതാക്കൾ ഉന്നയിച്ച വിമർശനങ്ങൾക്ക്​ മറുപടിയുമായി അധ്യക്ഷ സോണിയ ഗാന്ധി രംഗത്തെത്തിയിരുന്നു. താൻ കോൺഗ്രസി​െൻറ മുഴുവൻ സമയ അധ്യക്ഷയാണെന്ന്​ സോണിയ ഗാന്ധി പറഞ്ഞു. പാർട്ടി വർക്കിങ്​ കമ്മിറ്റി യോഗത്തിലാണ്​ അവരുടെ പരാമർശം. കോൺഗ്രസ്​ നേതൃത്വത്തിനെതിരെ വിമർശനമുയർത്തിയ ജി-23 നേതാക്കൾക്കുള്ള മറുപടി കൂടിയാണ്​ സോണിയ ഗാന്ധി നൽകിയത്​.

തന്നോട്​ എല്ലാം തുറന്ന്​ പറയുന്ന രീതിയെ താൻ ഇഷ്​ടപ്പെടുന്നുവെന്നും സോണിയ പറഞ്ഞു. മാധ്യമങ്ങളിലൂടെ തന്നോട്​ സംസാരിക്കേണ്ട ആവശ്യമില്ല. കോൺഗ്രസ്​ നേതൃത്വത്തിനെതിരെ വിമർശനം ഉന്നയിച്ച്​ നേതാക്കൾ എഴുതിയ കത്ത്​ മാധ്യമങ്ങളിലൂടെ പുറത്ത്​ വന്നതിലായിരുന്നു സോണിയ അതൃപ്​തി പ്രകടിപ്പിച്ചത്​. കർഷകസമരം, കോവിഡുകാലത്ത്​ ജനങ്ങൾക്ക്​ സഹായം നൽകൽ എന്നിവയിലെല്ലാം താൻ ഫലപ്രദമായി ഇടപ്പെട്ടുവെന്നും സോണിയ ചൂണ്ടിക്കാട്ടിയിരുന്നു.