ടി.ഒ. സൂരജിന്‍റെ 1.62 കോടിയുടെ സ്വത്ത്​ കൂടി ഇ.ഡി കണ്ടുകെട്ടി

ന്യൂഡൽഹി: വരവിൽ കവിഞ്ഞ സ്വത്ത്​ സമ്പാദിച്ച കേസിൽ മുൻ ഐ.എ.എസ്​ ഉദ്യോഗസ്ഥൻ ടി.ഒ. സൂരജിന്‍റെ 1.62 കോടി വരുന്ന ആസ്തികൾ കൂടി എൻഫോഴ്​സ്​മെന്‍റ്​ ഡയറക്ടറേറ്റ്​ കണ്ടുകെട്ടി. കള്ളപ്പണ നിരോധന നിയമപ്രകാരം സൂരജിന്‍റെയും കുടുംബാംഗങ്ങളുടെയും പേരിലുള്ള ഭൂമി, ബാങ്ക്​ അക്കൗണ്ടിലെ തുക, സ്​ഥിരനിക്ഷേപം, ഓഹരിനിക്ഷേപം എന്നിവയാണ്​ കണ്ടുകെട്ടിയത്​.

സൂരജിന്‍റെ സ്വത്തുവകകൾ നേരത്തെയും ഇ.ഡി കണ്ടുകെട്ടിയിരുന്നു. ഇപ്പോഴത്തേതുകൂടി കൂട്ടിയാൽ കണ്ടുകെട്ടിയ ആസ്തി 10.43 കോടി രൂപയാണ്​. 1994 ബാച്ച്​ ഐ.എ.എസ്​ ഉദ്യോഗസ്ഥനായിരുന്നു​ സൂരജ്​. കേരളത്തിൽ വിജിലൻസ്​-അഴിമതി നിരോധന വിഭാഗം ഫയൽചെയ്ത കുറ്റപത്രത്തിന്‍റെ അടിസ്ഥാനത്തിലാണ്​ ഇ.ഡി കള്ളപ്പണ കേസ്​ രജിസ്റ്റർ ചെയ്തത്​.

സ്വന്തം പേരിലും ഭാര്യയുടെയും മക്കളുടെയും പേരിലും നിരവധി സ്ഥലത്ത്​ ഭൂമിയും മറ്റ്​ ആസ്തികളും സൂരജ്​ വാങ്ങിക്കൂട്ടിയതായി അ​ന്വേഷണത്തിൽ തെളിഞ്ഞതായി ഇ.ഡി അധികൃതർ വിശദീകരിച്ചു. സഹായിയെ ബിനാമിയാക്കി വാഹനവും വാങ്ങി.