തിഹാർ ജയിലിൽ കഴിയുന്ന സിസോദിയയെ ഇ.ഡിയും അറസ്റ്റു ചെയ്തു

ന്യൂഡൽഹി: ഡൽഹി സർക്കാറിന്‍റെ മദ്യ നയവുമായി ബന്ധപ്പെട്ട കേസിൽ ഏഴ്​ ദിവസ​ത്തെ സി.ബി.ഐ കസ്റ്റഡി കാലാവധി അവസാനിച്ച്​ തിഹാർ ജയിലിൽ കഴിയുന്ന ഡൽഹി മുൻ ഉപമുഖ്യമന്ത്രി മനീഷ്​ സിസോദിയയെ എ​ൻ​ഫോഴ്​സ്​മെന്‍റ്​ ഡയ​റക്ടറേറ്റും​ അറസ്റ്റു ചെയ്തു. വ്യാഴാഴ്ച തിഹാർ ജയിലിൽ എത്തി ​ മണിക്കൂറുകളോളം ചോദ്യം ചെയ്തതിന്​ പിന്നാലെയാണ്​ ഇ.ഡിയും സിസോദിയുടെ അറസ്റ്റ്​​ രേഖപ്പെടുത്തിയത്​.

സി.ബി.ഐ അറസറ്റു ചെയ്ത കേസിൽ നാളെ കോടതി ജാമ്യ ഹരജി പരിഗണിക്കാനിരിക്കെയാണ്​ തലേ ദിവിസം ഇ.ഡിയുടെ നടപടി. ചൊവ്വാഴ്​ച സിസോദിയയെ ഇ.ഡി മണിക്കൂറുകൾ ചോദ്യം ചെയ്​തിരുന്നു. ഇതിന്​ പിന്നാലെയാണ്​ ഉദ്യോഗസ്​ഥർ രണ്ടാം തവണയും ജയിലിൽ എത്തി ചോദ്യം ചെയ്യലിന്​ ശേഷം അറസ്റ്റിലേക്ക്​ കടന്നത്​​.

കേസിൽ ഫെബ്രുവരി 26നാണ്​ സിസോദിയയെ സി.ബി.ഐ അറസ്റ്റ്​ ചെയ്തത്​. തിഹാർ ജയിലിലുള്ള സിസോദിയയുടെ ജീവന്‌ ഭീഷണിയുണ്ടെന്ന്‌ ആം ആദ്‌മി പാര്‍ട്ടി കഴിഞ്ഞ ദിവസം ആരോപിച്ചു. ഒന്നാം നമ്പർ ജയിലിൽ സിസോദിയക്ക്‌ ഒപ്പമുള്ളത്‌ രാജ്യത്തെ കൊടും കുറ്റവാളികളാണെന്നും അദ്ദേഹത്തെ അപായപ്പെടുത്താനുള്ള ഗൂഢനീക്കമാണിതിനുപിന്നിലെന്നും പാർട്ടി ആരോപിച്ചു.