കാളപ്പുറത്ത് നഗരത്തിൽ സുഖസവാരി; യുവാക്കൾ അറസ്റ്റിൽ

ഋഷികേശ്: ഉത്തരാഖണ്ഡിലെ ഋഷികേശിൽ യുവാവ് കാളപ്പുറത്ത് സവാരി നടത്തിയ വീഡിയോ കഴിഞ്ഞ ദിവസങ്ങളിലെല്ലാം വയറലായിരുന്നു. സിനിമാ സ്റ്റൈലിൽ ചിത്രീകരിച്ച വീഡിയോക്കെതിരെ നിരവധിപേർ രംഗത്തെത്തിയിരുന്നു. എന്നാൽ, വിഷയത്തിൽ നിയമനടപടി സ്വീകരിച്ചതായി ഉത്തരാഖണ്ഡ് പൊലീസ് അറിയിച്ചു.
സംഭവത്തിൽ പൊലീസിന്റെ പ്രതികരണം ഇങ്ങനെ.

'കഴിഞ്ഞ മെയ് 5 ന് രാത്രി ഋഷികേശിലെ തപോവനത്തിൽ കാളയുടെ പുറത്ത് കയറുന്നതിനെ കുറിച്ച് സോഷ്യൽ മീഡിയയിൽ പ്രചരിക്കുന്ന വീഡിയോ ശ്രദ്ധയിൽ പെട്ടിരുന്നു. സംഭവത്തിൽ യുവാക്കൾക്കെതിരെ നിയമനടപടി സ്വീകരിച്ചു. ഭാവിയിൽ മൃഗങ്ങളോട് ഈ രീതിയിൽ മോശമായി പെരുമാറരുതെന്ന് യുവാക്കൾക്ക് മുന്നറിയിപ്പ് നൽകി.'

എന്നാൽ യുവാക്കളുടെ അഭ്യാസ പ്രകടത്തിനെ അനുകൂലിച്ചും പ്രതികൂലിച്ചും നിരവധി പേർ രംഗത്തെത്തി. അനുകൂലിക്കുന്നവരിൽ പലരും ജെല്ലിക്കെട്ടുമായി താരതമ്യം ചെയ്യുകയും നിയമനടപടിക്കുള്ള കുറ്റമൊന്നും അവർ ചെയ്തില്ലെന്നും പറഞ്ഞു.