റിപബ്ലിക്​ ദിനത്തിൽ കർഷക പ്രതിഷേധത്തിനിടെയുള്ള സംഘർഷം; ഇടപെടില്ലെന്ന്​ സുപ്രീംകോടതി

ന്യൂഡൽഹി: റിപബ്ലിക്​ ദിനത്തിൽ കർഷകർ നടത്തിയ ട്രാക്​ടർ പരേഡിനിടെയുണ്ടായ സംഘർഷങ്ങളിൽ അന്വേഷണമാവശ്യപ്പെട്ട്​ സമർപ്പിച്ച ഹരജികളിൽ ഇട​പെടാതെ സുപ്രീംകോടതി. ചീഫ്​ ജസ്റ്റിസ്​ എസ്​.എ ബോബ്​ഡേ അധ്യക്ഷനായ മൂന്നംഗ ബെഞ്ചാണ്​ ഇതുമായി ബന്ധപ്പെട്ട ഹരജികൾ പരിഗണിച്ചത്​. എ.എസ്​ ബോപ്പണ്ണ, വി. രാമസുബ്രമണ്യം എന്നിവരും ബെഞ്ചിൽ അംഗങ്ങളാണ്​.

സർക്കാർ സംഘർഷങ്ങളിൽ അന്വേഷണം നടത്തുമെന്ന്​ ഉറപ്പുണ്ട്​. നിയമം നിയമത്തിന്‍റെ വഴിക്ക്​ നീങ്ങുമെന്ന പ്രധാനമന്ത്രിയുടെ പ്രസ്​താവന ഇതുമായി ബന്ധ​െപ്പട്ട്​ പുറത്ത്​ വന്നിട്ടുണ്ട്​. ഈയൊരു സാഹചര്യത്തിൽ കേസിൽ ഇടപെടാൻ ആഗ്രഹിക്കുന്നില്ലെന്ന്​ ബോബ്​ഡേ പറഞ്ഞു. ഇക്കാര്യത്തിൽ സർക്കാറിനെ സമീപിക്കാനും ഹരജിക്കാരോട്​ അദ്ദേഹം ആവശ്യപ്പെട്ടു.

അഭിഭാഷകനായ വിശാൽ തിവാരിയാണ്​ ഹരജി നൽകിയത്​. റിപബ്ലിക്​ ദിനത്തിലെ കർഷക സമരത്തിനിടെയുണ്ടായ സംഘർഷത്തെ കുറിച്ച്​ അന്വേഷിക്കാൻ മൂന്നംഗ കമീഷനെ നിയോഗിക്കണമെന്നായിരുന്നു ആവശ്യം. മുൻ സുപ്രീംകോടതി ജഡ്​ജിയും രണ്ട്​ മുൻ ഹൈകോടതി ജഡ്​ജിമാരും അടങ്ങുന്ന സമിതി സംഘർഷങ്ങളെ കുറിച്ച്​ അന്വേഷണം നടത്തണമെന്നായിരുന്നു ആവശ്യം.