ആധാർ നമ്പർ പരസ്യപ്പെടുത്തരുത്​ -യു.​െഎ.ഡി.എ.​െഎ

ന്യൂഡൽഹി: ആധാർ നമ്പർ പരസ്യപ്പെടുത്തരുതെന്ന്​ പൊതുജനങ്ങൾക്ക്​ സവിശേഷ തിരിച്ചറിയൽ അതോറിറ്റി ഒാഫ്​ ഇന്ത്യയുടെ (യു.​െഎ.ഡി.എ.​െഎ) മുന്നറിയിപ്പ്​. 12 അക്ക നമ്പർ ഇൻറർനെറ്റിലോ സോഷ്യൽ മീഡിയയിലോ പരസ്യപ്പെടുത്തുകയോ അതിന്​ ആരെയെങ്കിലും വെല്ലുവിളിക്കുകയോ ചെയ്യരുതെന്നാണ്​ യു.െഎ.ഡി.എ.​െഎ പ്രസ്​താവനയിൽ അറിയിച്ചത്​. 

ത​​​െൻറ ആധാർ നമ്പർ പരസ്യപ്പെടുത്തി അതുപയോഗിച്ച്​ സ്വകാര്യ വിവരങ്ങൾ ചോർത്താൻ ടെലികോം റെഗുലേറ്ററി അതോറിറ്റി ഒാഫ്​ ഇന്ത്യ (ട്രായ്​) മേധാവി ആർ.എസ്​. ശർമ നടത്തിയ വെല്ലുവിളി പൊല്ലാപ്പായതിനെ തുടർന്നാണ്​ യു.​െഎ.ഡി.എ.​െഎ മുന്നറിയിപ്പുമായി രംഗത്തെത്തിയത്​. വെല്ലുവിളി സ്വീകരിച്ച്​ ഹാക്കർമാർ ട്രായ്​ മേധാവിയുടെ ആധാർ നമ്പറുപയോഗിച്ച്​ ബാങ്ക്​ അക്കൗണ്ടിൽ വരെ കയറിയതായി അവകാശപ്പെട്ടിരുന്നു. 

പാസ്​പോർട്ട്​ നമ്പർ, ബാങ്ക്​ അക്കൗണ്ട്​ നമ്പർ, പാൻ നമ്പർ തുടങ്ങിയവയെ പോലെ ആധാർ നമ്പർ വ്യക്തിപരമായ സ്വകാര്യ വിവരമാണെന്ന്​ വ്യക്തമാക്കിയ യു.െഎ.ഡി.എ.​െഎ അത്​ പൊതുജനങ്ങൾക്ക്​ ലഭ്യമാവുന്ന വിധത്തിൽ പരസ്യപ്പെടുത്തരുതെന്ന്​ ഉണർത്തി. ആധാർ നിയമപ്രകാരവും ​െഎ.ടി നിയമപ്രകാരവും ഇത്​ അനുവദനീയമല്ല. മറ്റുള്ളവരുടെ ആധാർ നമ്പറുപയോഗിച്ച്​ അവരുടെ സ്വകാര്യ വിവരങ്ങളിൽ കടന്നുകയറുന്നതും ആധാർ നിയമവും ഇന്ത്യൻ പീനൽ കോഡും അനുസരിച്ച്​ കുറ്റകരമാണെന്നും യു.െഎ.ഡി.എ.​െഎ പ്രസ്​താവനയിൽ വ്യക്തമാക്കി.