മകനെ നീറ്റ് പരീക്ഷക്കെത്തിച്ച്​ ഡോക്ടർ ഹോട്ടലിൽ തൂങ്ങിമരിച്ചു

ഹൈദരാബാദ്​: മകനെ നാഷനൽ എലിജിബിലിറ്റി കം എൻട്രൻസ്​ ടെസ്റ്റ്​ (നീറ്റ്​) പരീക്ഷ കേന്ദ്രത്തിലെത്തിച്ച​ ശേഷം 50കാരനായ ഡോക്​ടർ ആത്മഹത്യ ചെയ്​തു. മേദകിലെ അസീംപുരയി​ൽ ശിശുരോഗ വിദഗ്​ധനായി പ്രാക്​ടീസ്​ ചെയ്യുന്ന ആർ. ചന്ദ്രശേഖറാണ്​ മരിച്ചത്​. ആത്മഹത്യ കുറിപ്പ്​ കണ്ടെത്തിയിട്ടില്ല.

വ്യവസായിയുടെ കൊലപാതകവുമായി ബന്ധപ്പെട്ട്​ ആഗസ്റ്റ്​ രണ്ടാം വാരം ചന്ദ്രശേഖറിനെ മേദക്​ പൊലീസ്​ ചോദ്യം ചെയ്​തിരുന്നതായി പ്രാഥമിക അന്വേഷണത്തിൽ കണ്ടെത്തി. ഗൈനക്കോളജിസ്റ്റായ ഭാര്യ അനുരാധയും ചന്ദ്രശേഖറും ചേർന്ന്​ മേദകിൽ അനുരാധ നഴ്​സിങ്​ ഹോം നടത്തി വരികയായിരുന്നു.

ഞായറാഴ്ച രാവിലെ ആറുമണിക്ക്​ ഭാര്യക്കും മകൻ സോഹൻ സായ്​ വെങ്കട്ടിനുമൊപ്പം ചന്ദ്രശേഖർ ഹൈദരാബാദിലെത്തി. ശേഷമാണ്​ മകനെ നിസാംപേട്ടിലുള്ള പരീക്ഷകേന്ദ്രത്തിലാക്കിയത്​.

'പരീക്ഷാകേന്ദ്രത്തിൽ സോഹനെ ഇറക്കിയ ശേഷം അനുരാധ അവരുടെ കാറിൽ മേദക്കിലേക്ക് മടങ്ങി. ചന്ദ്രശേഖർ കെ.പി.എച്ച്.ബി കോളനിയിലെ സിതാര ഗ്രാൻഡ് ഹോട്ടലിലേക്ക്​ പോയി. വിളിച്ചിട്ട്​ ചന്ദ്രശേഖർ ഫോൺ എടുക്കാതിരുന്നതോടെ ഭാര്യ ഉച്ച 2.30 ഓടെ ഹോട്ടൽ റിസപ്ഷനിലേക്ക്​ വിളിച്ചു. അവർ നടത്തിയ പരിശോധനയിലാണ്​ മുറിയിലെ സീലിങ്​ ഫാനിൽ നൈലോൺ കയർ ഉപയോഗിച്ച് തൂങ്ങിമരിച്ചതായി കണ്ടെത്തിയത്​. വ്യക്തിപരമായ പ്രശ്നങ്ങളെ തുടർന്ന് ചന്ദ്രശേഖർ ഏറെനാളായി വിഷാദ രോഗത്തിന്​ അടിമയായിരുന്നുവെന്ന്​ കുടുംബാംഗങ്ങൾ സൂചിപ്പിച്ചിട്ടുണ്ട്​'-കെ.പി.എച്ച്.ബി ഇൻസ്​പെക്​ടർ എസ്​. ലക്ഷ്​മിനാരായണൻ പറഞ്ഞു.

പൊലീസ്​ കേസ്​ രജിസ്​റ്റർ ചെയ്​ത്​ അന്വേഷണം ആരംഭിച്ചു. പ്രാഥമിക അന്വേഷണത്തിൽ വ്യവസായിയായ കെ. ശ്രീനിവാസിനെ കൊല​പ്പെടുത്തിയ കേസിൽ ചോദ്യം ചെയ്​ത ആറുപേരിൽ ഒരാളായിരുന്നു ചന്ദ്രശേഖറെന്ന്​ പൊലീസ്​ കണ്ടെത്തി.