കരുണാനിധിയുടെ ആരോഗ്യനിലയിൽ പുരോഗതി -കനിമൊഴി

ചെന്നൈ: രക്​തസമ്മർദം കുറഞ്ഞതിനെ തുടർന്ന്​ ആശുപത്രിയിൽ പ്രവേശിപ്പിച്ച ഡി.എം.കെ അധ്യക്ഷനും മുൻ മുഖ്യമന്ത്രിയുമായ എം. കരുണാനിധിയുടെ ആരോഗ്യനിലയിൽ നേരിയ പുരോഗതിയുണ്ടെന്ന്​ മകൾ കനിമൊഴി. രക്​തസമ്മർദം സാധാരണ നിലയിലെത്തിയിട്ടുണ്ടെന്നും മറ്റ്​ ആരോഗ്യപ്രശ്​നങ്ങളില്ലെന്നും കനിമൊഴി മാധ്യമങ്ങളെ അറിയിച്ചു. 

ആരോഗ്യനില മോശമായതിനെ തുടർന്ന്​ വെള്ളിയാഴ്​ച അർധ രാത്രിയോടെയാണ്​ 94കാരനായ കരുണാനിധിയെ ആശുപത്രിയിലേക്ക്​ മാറ്റിയത്​. ചെന്നൈയിലെ കാവേരി ആശുപത്രിയിലേക്കാണ്​ മാറ്റിയത്​. 

 കരുണാനിധിയുടെ ആരോഗ്യ നിലയിൽ പുരോഗതിയു​െണ്ടന്നും വ്യാജ പ്രചാരണങ്ങൾ പ്രവർത്തകർ വിശ്വസിക്കരുതെന്നും മകൻ എം.കെ സ്​റ്റാലിൻ പ്രസ്​താവനയിൽ അറിയിച്ചു. കരുണാനിധി അപകട നില തരണം ചെയ്​തിട്ടുണ്ടെന്ന്​ മുൻ കേന്ദ്ര മന്ത്രിയായ എ. രാജയും അറിയിച്ചു. 

വാർധക്യസഹജമായ അവശതകൾക്കൊപ്പം മൂത്രനാളിയിലെ അണുബാധയും പനിയും മൂലം അവശ നിലയിലായിരുന്ന കരുണാനിധിയെ ആശുപത്രിയിൽനിന്നുള്ള ഡോക്​ടർമാരുടെയും നഴ്​സുമാരുടെയും സംഘം ഗോപാലപുരത്തെ വസതിയിൽ ക്യാമ്പ്​ ചെയ്​ത്​ ചികിത്സിച്ച്​ വരികയായിരുന്നു.