രാഹുൽ ഗാന്ധിയുടെ അയോഗ്യത: ജയിൽ നിറക്കാൻ കോൺഗ്രസ്​

ന്യൂഡൽഹി: രാഹുൽ ഗാന്ധിയുടെ എം.പി സ്ഥാനത്തിന്​ അയോഗ്യത കല്പിച്ച നടപടിക്കും അദാനി വിഷയത്തിൽ ജെ.പി.സി അന്വേഷണമില്ലെന്ന സർക്കാർ നിലപാടിനുമെതിരെ ഒരു മാസം നീളുന്ന ദേശവ്യാപക സമര പരിപാടികൾ പ്രഖ്യാപിച്ച്​ കോൺഗ്രസ്​.

ബ്ലോക്ക്​ മുതൽ ദേശീയതലം വരെ ജയ്​ ഭാരത്​ മഹാ സത്യഗ്രഹം അടക്കമുള്ള പരിപാടികളാണ്​ നിശ്ചയിച്ചിട്ടുള്ളത്​. ഏപ്രിൽ 15 മുതൽ 30 വരെ ജയിൽ നിറക്കൽ സമരം സംഘടിപ്പിക്കും. രാഹുൽ ഗാന്ധിക്കെതിരായ നടപടികളിൽ പ്രതിഷേധിച്ച്​ ഒരു മാസത്തെ ജയ്​ഭാരത്​ സത്യഗ്രഹ അടക്കം ദേശീയ, സംസ്ഥാന, ജില്ലാ തലങ്ങളിൽ സമരപരിപാടികൾ കോൺഗ്രസ്​ പ്രഖ്യാപിച്ചിട്ടുണ്ട്​. പിന്നാക്ക, ന്യൂനപക്ഷ സെല്ലുകളുടെ നേതൃത്വത്തിൽ അംബേദ്​കർ, ഗാന്ധി പ്രതിമകൾക്കു മുന്നിൽ ഏപ്രിൽ മൂന്നു മുതൽ പ്രതിഷേധ പരിപാടികൾ ദേശവ്യാപകമായി നടക്കും. ഏപ്രിൽ മൂന്നിന്​ പ്രധാനമന്ത്രിക്ക്​ വിവിധ ചോദ്യങ്ങൾ ഉന്നയിച്ച്​ പതിനായിരങ്ങൾ പോസ്റ്റ്​ കാർഡ്​ അയക്കുന്ന പരിപാടി സംഘടിപ്പിക്കുമെന്ന്​ യൂത്ത്​ കോൺഗ്രസ്​ അറിയിച്ചു.

ഇതിനിടെ, ഏപ്രിൽ അഞ്ചിന്​ കർണാടകത്തിലെ കോലാർ സന്ദർശിക്കാൻ ഒരുങ്ങുകയാണ്​ രാഹുൽ ഗാന്ധി. അദ്ദേഹത്തിന്‍റെ എം.പി സ്ഥാനത്തിന്​ അയോഗ്യത കല്പിക്കുന്നതിലേക്ക്​ നയിച്ച അപകീർത്തി കേസ്​ കോലാർ പ്രസംഗത്തിന്‍റെ പേരിലായിരുന്നു.