ഭർത്താവും ഭാര്യയും തമ്മിലെ തർക്കം കുട്ടിയെ ബാധിക്കരുത്​-സുപ്രീംകോടതി

ന്യൂഡൽഹി: ഭാര്യ-ഭർതൃ തർക്കം കുട്ടിയെ ദോഷകരമായി ബാധിക്കരുതെന്ന്​ സുപ്രീംകോടതി. വിവാഹമോചിതരായ ദമ്പതികളുടെ 13കാരനായ മകനെ പ്രായപൂർത്തിയാകുന്നതുവരെ സംരക്ഷി​േക്കണ്ട ബാധ്യത പിതാവിനുണ്ടെന്നും ജസ്റ്റിസുമാരായ എം.ആർ ഷാ, എ.എസ്​. ബോപ്പണ്ണ എന്നിവരടങ്ങിയ ബെഞ്ച്​ വിധിച്ചു.

18 വയസുവരെ മക‍​െൻറ ചെലവിലേക്കായി മാതാവിന്​ 50,000 രൂപ പ്രതിമാസം നൽകാനും​ കരസേന ഉദ്യോഗസ്ഥനായ പിതാവിനോട്​ കോടതി നിർദേശിച്ചു. 2005 നവംബറിൽ വിവാഹിതരാവുകയും 2011 മുതൽ വേർപിരിഞ്ഞ്​ താമസിക്കുകയും ചെയ്യുന്ന ദമ്പതികൾ തമ്മിലെ കേസിലാണ്​ കോടതി ഇടപെടൽ.

നേരത്തെ കുടുംബ കോടതി ഇവർക്ക്​ വിവാഹമോചനം നൽകിയിരുന്നു. 2011 മുതൽ വേർപിരിഞ്ഞ്​ താമസിക്കുന്നതിനാൽ ഇനി ഇരുവരും ഒരുമിച്ച്​ താമസിക്കണമെന്ന്​ ആവശ്യപ്പെടുന്നതിൽ കാര്യമില്ലെന്ന്​ നിരീക്ഷിച്ച സുപ്രീം കോടതി, ഇവരുടെ കുട്ടി ദാമ്പത്യ തർക്കംമൂലം ബുദ്ധിമുട്ട്​ അനുഭവിക്കാൻ ഇടവരരുതെന്ന്​ ​ ചൂണ്ടിക്കാട്ടി. മാതാവിന്​ വരുമാനമില്ല. അതിനാൽ, കുട്ടിയുടെ വിദ്യാഭ്യാസത്തിനും മറ്റാവശ്യങ്ങൾക്കും അവർക്ക്​ നിശ്​ചിത തുക പിതാവ്​ നൽകേണ്ടതുണ്ടെന്നും കോടതി പറഞ്ഞു.

ഭർത്താവിനെതിരെ വിവാഹേതര ബന്ധം ചൂണ്ടിക്കാണിച്ചാണ്​ ഭാര്യ കുടുംബ കോടതിയെ സമീപിച്ചത്​. ഭാര്യയുടെ പീഡനങ്ങൾക്കെതിരെ ജയ്പൂരിലെ കുടുംബകോടതിയിൽ ഭർത്താവും പരാതി നൽകിയിരുന്നു. ഇതംഗീകരിച്ചാണ്​ വിവാഹമോചനം നൽകിയത്​.