ബി.ജെ.പി വിടാനുള്ള കാരണം തുറന്നുപറഞ്ഞ്​ ബാബുൽ സുപ്രിയോ; തൃണമൂലിൽ ഏറെ പ്രതീക്ഷയെന്ന്​

ന്യൂഡൽഹി: മുൻ കേന്ദ്രമന്ത്രിയും ബി.ജെ.പി എം.പിയുമായ ബാബുൽ സുപ്രിയോ കഴിഞ്ഞദിവസം​ തൃണമൂൽ കോൺഗ്രസിൽ ചേർന്നിരുന്നു. മാസങ്ങൾക്കുമുമ്പ്​ രാഷ്​ട്രീയം വിടുമെന്ന്​ ബാബുൽ സുപ്രിയോ അറിയിച്ചിരുന്നുവെങ്കിലും മ​റ്റേതെങ്കിലും രാഷ്​ട്രീയപാർട്ടിയിൽ ചേരുന്നതിനെകുറിച്ച്​ സൂചനകൾ നൽകിയിരുന്നില്ല. തൃണമൂലിൽ ചേർന്നശേഷം താൻ ബി.ജെ.പി വിടാനുള്ള കാരണം തുറന്നുപറഞ്ഞിരിക്കുകയാണ്​ അദ്ദേഹം.

'ഞാൻ കടുത്ത നിരാശയിലായിരുന്നു. ഏഴ് വർഷത്തെ കഠിനാധ്വാനം ഫലം കണ്ടില്ല'-സുപ്രിയോ ഒരു ദേശീയമാധ്യമത്തോട്​ പറഞ്ഞു. 'കഴിഞ്ഞ മൂന്ന് ദിവസത്തിനുള്ളിൽ എല്ലാം സംഭവിച്ചു. തൃണമൂൽ കോൺഗ്രസി​െൻറ ഡെറിക് ഒബ്രിയനാണ് ആവേശകരവും വെല്ലുവിളി നിറഞ്ഞതുമായ അവസരത്തെക്കുറിച്ച് എന്നോട് പറഞ്ഞത്. രാഷ്ട്രീയം ഉപേക്ഷിക്കുന്നുവെന്ന്​ രണ്ട് മാസം മുമ്പ് പറഞ്ഞപ്പോള്‍, ഞാന്‍ അതിനെക്കുറിച്ച് ഗൗരവപൂര്‍വ്വം തന്നെയാണ് ആലോചിച്ചത്. എന്നാല്‍ ഈ അവസരം ലഭിച്ചതിനുശേഷം, ഞാന്‍ എ​െൻറ മനസ്സ് മാറ്റാന്‍ തീരുമാനിച്ചു'-അസൻസോൾ എം.പി കൂടിയായ അദ്ദേഹം പറഞ്ഞു.

'ജീവിതത്തിൽ ചില കാര്യങ്ങൾ നിങ്ങൾക്ക് സംഭവിക്കും. ​ ഉചിതമെന്ന് തോന്നുന്ന രീതിയിൽ നിങ്ങൾ പ്രതികരിക്കുന്നു. ഞാൻ രാഷ്ട്രീയം വിടുന്നെന്ന്​ പറഞ്ഞത്​ പൂർണഹൃദയത്തോടെയാണ്'-അദ്ദേഹം പറഞ്ഞു.

'മമത ദീദിയും അഭിഷേകും (ബാനർജി) നൽകിയ ഉൗഷ്​മള സ്വീകരണം അതിരറ്റതായിരുന്നു. കേന്ദ്ര രാഷ്ട്രീയത്തിലെ എ​െൻറ ഏഴ് വർഷത്തെ അനുഭവം ഒരു പുതിയ രീതിയിൽ പുനരുജ്ജീവിപ്പിക്കാനാകുമെന്നാണ്​ കരുതുന്നത്​'-അദ്ദേഹം പറഞ്ഞു. ഒരു സ്പോർട്​സ്​ ടീമിൽ 'ബെഞ്ചിൽ ഇരിക്കുന്നത് ശരിയല്ല' എന്ന്​ തനിക്ക്​ തോന്നിയിരുന്നതായും ബി.ജെ.​പിയിലെ അവഗണനയെക്കുറിച്ച്​ അദ്ദേഹം പറഞ്ഞു.

തൃണമൂൽ കോൺഗ്രസ്​ ദേശീയ ജനറൽ സെക്രട്ടറി അഭിഷേക്​ ബാനർജി, രാജ്യസഭ എം.പി ഡെറിക്​ ഒബ്രിയാൻ എന്നിവർ ചേർന്നാണ്​​ ബാബുൽ സുപ്രിയോയെ തൃണമൂലിലേക്ക്​ സ്വീകരിച്ചത്​.

പശ്​ചിമബംഗാളിൽ മമത ബാനർജി അധികാരം പിടിച്ചതിന്​ ശേഷം തൃണമൂൽ കോൺഗ്രസിലെത്തുന്ന അഞ്ചാമത്തെ ബി.ജെ.പി നേതാവ്​ ബാബുൽ സുപ്രിയോ. മറ്റ്​ നാല്​ പേരും ബി.ജെ.പി എം.എൽ.എമാരാണ്​.