ഗ്രെറ്റ ടൂൾകിറ്റ്​ കേസ്​: ദിശയെ തിരഞ്ഞ്​ ഡൽഹി പൊലീസ്​ എത്തിയത്​ ബംഗളൂരു പൊലീസ്​ അറിയാതെ

ബംഗളൂരു: രാജ്യദ്രോഹക്കുറ്റം ആരോപിച്ച്​ ശനിയാഴ്​ച കാലാവസ്​ഥ ആക്​ടിവിസ്​റ്റ്​ ദിശ രവിയെ കസ്​റ്റഡിയിലെടുക്കാൻ ബംഗളൂരു നഗരത്തിൽ ഡൽഹി പൊലീസ്​ എത്തിയത്​ സംസ്​ഥാന പൊലീസ്​ അറിയാതെ. ദിശ രവിയുടെ നീക്കങ്ങൾ സൂക്ഷ്​മമായി നിരീക്ഷിച്ച ശേഷം ഡൽഹി പൊലീസിലെ രണ്ടു വനിതകളടങ്ങിയ അഞ്ചു പേരുടെ സംഘം ശനിയാഴ്​ച ഉച്ച 12 മണിയോടെയാണ്​ ബംഗളൂരുവിൽ ഇറങ്ങുന്നത്​. വടക്കൻ ബംഗളൂരുവിൽ ചിക്കബനവരയിലെ അബ്ബിഗെരെയിൽ ദിശ താമസിച്ചുവന്ന വീടിനു സമീപമെത്തിയ സംഘം ഫോൺ നിരീക്ഷിച്ച്​ ഇവർ അകത്തുണ്ടെന്ന്​ ഉറപ്പാക്കി.

തുടർന്ന്​ ഒരു കാറിൽ മൂന്നു പുരുഷൻമാർ വീട്ടുപരിസരം നിരീക്ഷിക്കാനെത്തി മടങ്ങി. അതുകഴിഞ്ഞ്​ രണ്ടു വനിത പൊലീസുകാരെ കൂടി കൂട്ടി വീണ്ടുമെത്തി. പുരുഷൻമാർ പുറത്തുകാത്തുനിന്ന സമയം വനിത പൊലീസുകാർ ദിശയുടെ വാതിലിൽ മുട്ടി. തുറന്നയുടൻ അകത്തുകയറിയ ഇരുവരും അറസ്​റ്റ്​ നടപടികളിലേക്ക്​ കടന്നു. തുടർന്ന്​, രണ്ടു പുരുഷൻമാർ കൂടി കയറി നടപടികൾ പൂർത്തിയാക്കി ദിശയുമായി മടങ്ങി.

പൊലീസ്​ ഐ.ഡിയും അറസ്​റ്റ്​ വാറൻറും കാണിച്ച ശേഷം മാത്രമാണ്​ പൊലീസ്​ സംഘത്തെ ദിശയും മാതാവും അകത്തുകയറ്റിയതെന്ന്​ അധികൃതർ പറയുന്നു.

അറസ്​റ്റ്​ കഴിഞ്ഞയുടൻ പൊലീസ്​ സംഘം ദിശയുടെ ലാപ്​ടോപ്പും മൊബൈൽ ഫോണുകളും പരിശോധിച്ചു. ഒരാൾ എല്ലാം റെക്കോഡ്​ ചെയ്യുന്ന തിരക്കിലായിരുന്നു. ഇതിനിടെ, മാതാവ്​ മഞ്​ജുളയുടെ ഒപ്പും സംഘം വാങ്ങി. ഡൽഹി പൊലീസ്​ സൈബർ ക്രൈം വിഭാഗമാണ്​ അറസ്​റ്റ്​ ചെയ്യുന്നത്​ എന്നതു സംബന്ധിച്ചായിരുന്നു ഒപ്പുവാങ്ങൽ.

വൈകുന്നേരം 5.30 ഓടെ പൊലീസ്​ സംഘം എയർ​പോർട്ടിലേക്ക്​ നീങ്ങി. ഇതിനിടെ ദിശയുടെ വസ്​ത്രങ്ങൾ, മരുന്നുകൾ, പഴങ്ങൾ തുടങ്ങിയവ കൂടി കരുതാൻ പൊലീസ്​ നിർദേശിച്ചിരുന്നു.

പോകുംവഴി പൊലീസ്​ സംഘം രണ്ടായി പിരിഞ്ഞു. ഒരുപറ്റം നേരെ കെമ്പഗൗഡ എയർപോർട്ട്​ ലക്ഷ്യമാക്കി നീങ്ങിയപ്പോൾ രണ്ടാം സംഘം സോളദേവനഹള്ളി പൊലീസ്​ സ്​റ്റേഷനിലെത്തി അറസ്​റ്റ്​ വിവരം അറിയിച്ചു. ഇതറിഞ്ഞ നാട്ടിലെ ​പൊലീസ്​ വാഹനത്തിൽ ദിശയുടെ വീട്ടുപരിസരം വരെ പോയി നിരീക്ഷണം നടത്തിയതായും റിപ്പോർട്ടുകൾ പറയുന്നു.

ലോകമറിയുന്ന പ്രമുഖ പരിസ്​ഥിതി പ്രവർത്തകയായ ദിശ രവിയുടെ അറസ്​റ്റിനെതിരെ രാജ്യത്ത്​ പ്രതിഷേധം ശക്​തമാണ്​. 2018ൽ ബംഗളൂരുവിലെ മൗണ്ട്​ കാർമൽ കോളജിൽനിന്ന്​ ബിരുദം പൂർത്തിയാക്കുന്നതിന്​ ഏറെ മുമ്പുതന്നെ ഇവർ പരിസ്​ഥിതി ബോധവത്​കരണവുമായി സജീവമാണ്​.