സംവിധായകൻ ടി. രാമറാവു അന്തരിച്ചു

ചെന്നൈ: പ്രശസ്ത സംവിധായകനും നിർമാതാവുമായ താതിനേനി രാമറാവു (ടി. രാമറാവു -83) ചെന്നൈയിൽ അന്തരിച്ചു. വാർധക്യസഹജമായ അസുഖത്തെ തുടർന്ന് സ്വകാര്യ ആശുപത്രിയിൽ ചികിത്സയിലായിരുന്നു. ബുധനാഴ്ച പുലർച്ചെയായിരുന്നു അന്ത്യം.

സംസ്കാരം ബുധനാഴ്ച വൈകീട്ട് ചെന്നൈയിൽ നടക്കും. ഭാര്യ: താതിനേനി ജയശ്രീ. മക്കൾ: ചാമുണ്ടേശ്വരി, നാഗസുശീല, അജയ്.

തെലുങ്ക്, തമിഴ്, ഹിന്ദി സിനിമ മേഖലയിലെ നിരവധി പ്രമുഖർക്കൊപ്പം ടി. രാമറാവു പ്രവർത്തിച്ചിട്ടുണ്ട്. 1966 മുതൽ 2000 വരെ സിനിമ മേഖലയിൽ സജീവമായിരുന്ന ഇദ്ദേഹം 70ഓളം സിനിമകൾ സംവിധാനം ചെയ്തിട്ടുണ്ട്. സംവിധാനം കൂടാതെ, ശ്രീലക്ഷ്മി പ്രൊഡക്ഷൻസിന്റെ ബാനറിൽ തമിഴ് സിനിമകൾ നിർമിക്കുകയും ചെയ്തു.