സ്റ്റാൻ സ്വാമിയുടെ മരണത്തിൽ പ്രതിഷേധവുമായി യു.എൻ ഉദ്യോഗസ്ഥയും യൂറോപ്യൻ യൂണിയൻ​ പ്രതിനിധിയും

വൈദികനും മനുഷ്യവകാശ പ്രവർത്തകനുമായിരുന്ന ഫാ. സ്റ്റാൻ സ്വാമിയുടെ മരണത്തിൽ പ്രതിഷേധം രേഖപ്പെടുത്തി യു.എൻ ഉദ്യോഗസ്ഥയും യൂറോപ്യൻ യൂണിയൻ പ്രതിനിധിയും രംഗത്ത്​. ഫാദർ സ്റ്റാൻ സ്വാമിയെ ജയിലിലടച്ചത്​ തെറ്റായ തീവ്രവാദക്കുറ്റം ചുമത്തിയാണെന്ന്​ യു.എന്നിലെ മുതിർന്ന ഉദ്യോഗസ്ഥയായ മേരി ലാവ്​ലർ ട്വീറ്റ്​ ചെയ്​തു. യൂറോപ്യൻ യൂണിയൻ മനുഷ്യാവകാശ കമ്മിറ്റി പ്രത്യേക പ്രതിനിധി ഇൗമൻ ഗിൽമോറും പ്രതിഷേധവുമായി രംഗത്തെത്തി.

'' ഇന്ത്യയിൽ നിന്നും ഇപ്പോൾ വരുന്ന വാർത്തകൾ ഉള്ളുലക്കുന്നതാണ്​. ഒൻപത്​ മാസമായി തെറ്റായ തീവ്രാദക്കുറ്റം ചുമത്തി ജയിലിലടച്ച സ്റ്റാൻ സ്വാമി കസ്റ്റഡിയിൽ മരിച്ചിരിക്കുന്നു. മനുഷ്യാവകാശത്തിനായി പ്രവർത്തിക്കുന്നവരെ ജയിലിടക്കുന്നത്​ ന്യായീകരിക്കാനാകത്താണ്'' -മേരി ലാവ്​ലർ ട്വീറ്റ്​ ചെയ്​തു.

മേരി ലാവ്​ലറുടെ ട്വീറ്റ്​ പങ്കുവെച്ചാണ്​​ യൂറോപ്യൻ യൂണിയൻ പ്രത്യേക പ്രതിനിധി ഇൗമൻ ഗിൽമോർ പ്രതിഷേവുമായി രംഗത്തെത്തിയയത്​. ''ഇന്ത്യാ.. സ്റ്റാൻ സ്വാമിയുടെ മരണത്തിൽ ഞാൻ വളരെയധികം ദുഖിതനാണ്​. സ്വദേശികളുടെ അവകാശങ്ങൾക്കായി നിലകൊണ്ടയാളായിരുന്നു അദ്ദേഹം. കഴിഞ്ഞ ഒൻപതുമാസമായി അദ്ദേഹം തടവിലായിരുന്നു. യൂറോപ്യൻ യൂണിയൻ ഇന്ത്യയിലെ അധികൃതരുമായി ഈ വിഷയം പലകുറി സംസാരിച്ചിരുന്നു'' -ഈമൻ ട്വീറ്റ്​ ചെയ്​തു.

2018 ജനുവരി ഒന്നിന് നടന്ന ഭീമ കൊറേഗാവ് കലാപ കേസിൽ ഗൂഢാലോചന ആരോപിച്ചായിരുന്നു സ്റ്റാൻ സ്വാമിയെ അറസ്റ്റ് ചെയ്​തത്​​. നാഡിവ്യൂഹത്തെ ബാധിക്കുന്ന പാർക്കിൻസൺ രോഗബാധിതനായ അദ്ദേഹത്തിന് നവി മുംബൈയിലെ തലോജ ജയിലിൽ വെച്ച് കൃത്യമായ ചികിത്സ ലഭിച്ചിരുന്നില്ലെന്ന്​ പരാതി ഉയർന്നിരുന്നു. ഇതോടെ നില വഷളായി. ചികിത്സക്കായി ജാമ്യം ലഭിച്ച അദ്ദേഹം മുംബൈ ഹോളി ഫെയ്​ത്ത്​ ഹോസ്​പിറ്റലിൽ വെച്ചാണ്​ മരിച്ചത്​.