കുഞ്ഞി​െൻറ മൃതദേഹം ഗ്രാമത്തിലെത്തിച്ചത്​ സൈക്കിളിൽ 

ലഖ്​നോ: സഹോദരീപുത്രിയുടെ  മൃതദേഹം തോളിലിട്ട്​ യുവാവ്​ സൈക്കിളിൽ സഞ്ചരിച്ചത്​ 10 കിലോമീറ്റർ. നഗരത്തിലെ സർക്കാർ ആശുപത്രിയിൽ വെച്ച്​ മരിച്ച പൂനം എന്ന പെൺകുട്ടിയുടെ മൃതദേഹം ഗ്രാമത്തിലെത്തിക്കാൻ ആംബുലൻസ്​ കിട്ടാത്തതിനെ തുടർന്ന്​ അമ്മാവനായ ബ്രിജ്​ മോഹൻ സൈക്കിളിൽ മൃതദേഹവുമായി തിരിക്കുകയായിരുന്നു. ഉത്തർപ്രദേശിലെ കൗശാമ്പിയിലാണ്​ യുവാവിന്​ കുഞ്ഞി​​​െൻറ മൃതദേഹം സൈക്കിളിൽ ഗ്രാമത്തിലെത്തിക്കേണ്ടി വന്നത്​. 

അതിസാരം മൂലം ജില്ലാ ആശുപത്രിയിൽ ചികിത്സയിലായിരുന്ന പൂനം തിങ്കളാഴ്​ച രാവിലെ മരണപ്പെടുകയായിരുന്നു. മൃതദേഹം ഗ്രാമത്തിലെത്തിക്കാൻ ആംബുലൻസ്​ അനുവദിക്കണമെന്ന്​ ആശുപത്രി അധികൃതരോട്​ ആവശ്യപ്പെ​െട്ടങ്കിലും ഇന്ധനത്തിനായുള്ള പണം കെട്ടിവെക്കണമെന്ന്​ ആവശ്യപ്പെടുകയായിരുന്നു. പണം തികയില്ലെന്ന്​ അറിയിച്ചെങ്കിലും ആംബുലൻസ്​ നൽകാൻ അധികൃതർ തയാറായില്ല. തുടർന്ന്​ ബ്രിജ്​ മോഹൻ പുതപ്പിൽ പൊതിഞ്ഞെടുത്ത കുഞ്ഞി​​​െൻറ മൃതദേഹവും തോളിലിട്ട്​ ത​​​െൻറ സൈക്കിൾ ചവിട്ടി ​ഗ്രാമത്തിലേക്ക്​ തിരിക്കുകയായിരുന്നു. 

പൂനത്തി​​​െൻറ പിതാവ്​ ജോലിതേടി പോയിരിക്കയായിരുന്നുവെന്നും ത​​​െൻറ കയ്യിലുള്ള പണമെല്ലാം മരുന്നിനും മറ്റുമായി ചെലവഴിച്ചു കഴിഞ്ഞിരുന്നുവെന്നും ബ്രിജ്​ മോഹൻ പറഞ്ഞു. ആംബുലൻസ്​ ആവശ്യപ്പെട്ടപ്പോൾ ഇന്ധനത്തിനുള്ള പണം സർക്കാർ തരുന്നില്ലെന്നും അതിനാൽ പണം മൂൻകൂർ അടച്ചാൽ മാത്രമേ വാഹനം ലഭിക്കുകയുള്ളൂയെന്നാണ്​ മെഡിക്കൽ സൂപ്രണ്ട്​ അറിയിച്ചതെന്നും മോഹൻ പറഞ്ഞു. 

 പാവപ്പെട്ടവർക്ക്​ സർക്കാർ ആശുപത്രികളിൽ നിന്ന്​ സൗജന്യ ആംബുലനസ്​ സേവനം ലഭ്യമാക്കണമെന്നാണ്​ നിയമം. സംഭവത്തിൽ  ഡ്യൂട്ടിയിലുണ്ടായിരുന്ന ഡോക്​ടർക്കും ആംബുലൻസ്​ ഡ്രൈവർക്കുമെതിരെ കേസ്​ രജിസ്​റ്റർ ചെയ്​തതായി ജില്ലാ മെഡിക്കൽ ഒാഫീസർ ഡോ. എസ്​.കെ ഉപാദ്ധ്യായ്​ അറിയിച്ചു. 

സൗജന്യ ആംബുലൻസ്​ സൗകര്യം നിഷേധിച്ചതിനെ തുടർന്ന്​ മേയ്​ 20 ന്​ വൃദ്ധൻ ഭാര്യയുടെ മൃതദേഹം സ്​ട്രച്ചറിൽ ഉന്തി കൊണ്ടുപോയതും  വാർത്തയായിരുന്നു. ഉത്തർപ്രദേശിലെ എത്വാവയിൽ മകൻ  അമ്മയുടെ മൃതദേഹം ബൈക്കിൽ വെച്ചുകെട്ടി കൊണ്ടുപോയതും വിവാദമായി.