സിംഘു അതിർത്തിയിലെത്തിയ രണ്ടു മാധ്യമപ്രവർത്തകർ പൊലീസ്​ കസ്റ്റഡിയിൽ

ന്യൂഡൽഹി: സിംഘു അതിർത്തിയിൽ കർഷക പ്രക്ഷോഭം റിപ്പോർട്ട്​ ചെയ്യാനെത്തിയ മാധ്യമപ്രവർത്തകർ ഡൽഹി പൊലീസ്​ കസ്റ്റഡിയിൽ. കാരവൻ മാഗസിൻ ലേഖകനും ഫ്രീലാൻസ്​ മാധ്യമപ്രവർത്തകനുമായ മൻദീപ്​ പുനിയ, ഓൺ​ലൈൻ ന്യൂ ഇന്ത്യയിലെ ധർമേന്ദർ സിങ്​ എന്നിവരാണ്​ പൊലീസ്​ കസ്റ്റഡിയിലുള്ളതെന്നാണ്​ വിവരം.

സിംഘു അതിർത്തിയിൽ കഴിഞ്ഞ ദിവസമുണ്ടായ സംഘർഷത്തിന്​​ ശേഷം കാരവൻ മാഗസിന്​ വേണ്ടി കർഷകരെ കാണാനെത്തിയതായിരുന്നു മൻദീപ്​ പുനിയ. പ്രക്ഷോഭ സ്​ഥലത്തിന്‍റെ കവാടത്തിൽ വെച്ചുതന്നെ പൊലീസ്​ ഇവരെ തടഞ്ഞു. തുടർന്ന്​ പ്രദേശവാസികളിലൊരാൾ ആ വഴി കടന്നുപോയപ്പോൾ പൊലീസുകാരുമായി സംസാരിക്കുന്നത്​ മൻദീപ്​ വിഡിയോയിൽ പകർത്തുകയായിരുന്നു.

തുടർന്ന്​ മൻദീപിനെയും ധർമേന്ദർ സിങ്ങിനെയും പൊലീസ്​ കസ്റ്റഡിയിലെടുക്കുകയും അലിപുർ സ്​റ്റേഷനിലെത്തിക്കുകയുമായിരുന്നു. എന്നാൽ ഇരുവരും ഇപ്പോൾ സ്​റ്റേഷനി​ലുണ്ടോയെന്ന കാര്യം വ്യക്തമല്ലെന്ന്​ 'ന്യൂസ്​ലോൻഡ്രി' റിപ്പോർട്ട്​ ചെയ്യുന്നു. പൊലീസുകാരോട്​ അപമര്യാദയായി പെരുമാറിയെന്ന്​ ആരോപിച്ചാണ്​ നടപടി.

വെള്ളിയാഴ്ച സിംഘു അതിർത്തിയിൽ കർഷകർക്ക്​ നേരെ ആക്രമണം അഴിച്ചുവിട്ടിരുന്നു. പൊലീസിന്‍റെയും പ്രദേശവാസി​കളെന്ന രൂപേണയെത്തിയ ആർ.എസ്​.എസ്​ ഗുണ്ടകളുടെയും നേതൃത്വത്തിലായിരുന്നു ആക്രമണം.

കർഷകരുടെ ടെന്‍റ്​ ഇവർ പൊളിച്ചുനീക്കി. സംഘർഷം അരങ്ങേറിയ​തിന്​ പിന്നാലെ പ്രദേശത്ത്​ മാധ്യമപ്രവർത്തകർക്ക്​ നിയന്ത്രണം ഏർപ്പെടുത്തി. പ്രക്ഷോഭസ്​ഥലം​ കൂറ്റൻ കോ​ൺക്രീറ്റ്​ ബാരിക്കേഡുകൾ ഉപയോഗിച്ച്​ അടക്കുകയും ചെയ്​തു. ഇവിടെ ഇന്‍റർനെറ്റും വിച്ഛേദിച്ചിരിക്കുകയാണ്​.