ഭീതിക്കിടെ എയർ ഇന്ത്യ വിമാനം കാബൂളിൽ; അഫ്​ഗാനിൽ കുടുങ്ങിയ ഇന്ത്യക്കാരുമായി മടങ്ങും

കാബൂൾ: മണിക്കൂറുകൾ നീണ്ട അനിശ്​ചിതത്വത്തിനൊടുവിൽ എയർ ഇന്ത്യ വിമാനം അഫ്​ഗാനിസ്​താൻ തലസ്ഥാനമായ കാബൂളിൽ ലാൻഡ്​ ചെയ്​തു. ഞായറാഴ്ച ഉച്ചക്ക്​ 12.43ന്​ ഡൽഹിയിൽ നിന്ന്​ ​പുറപ്പെട്ട എയർബസ്​ എ 320 വിമാനമാണ്​ കാബൂളിൽ ലാൻഡ്​ ചെയ്​തത്​. രണ്ട്​ മണിക്കൂർ വൈകി കാബൂൾ സമയം 1.45നാണ്​ വിമാനം പറന്നിറങ്ങിയത്​.

40 പേരുമായാണ്​​ വിമാനം കാബൂളിലേക്ക്​ യാത്രതിരിച്ചത്​. 162 യാത്രക്കാരുമായാവും കാബൂളിൽ നിന്നും വിമാനം ഡൽഹിയിലേക്ക്​ തിരികെ വരിക. ലാൻഡിങ്ങിന്​ ക്ലിയറൻസ്​ ലഭിക്കാത്തതിനെ തുടർന്നാണ്​ എയർ ഇന്ത്യ വിമാനം വൈകിയതെന്നാണ്​ സൂചന. ഇതേ സമയം തന്നെ എമിറേറ്റ്​സ്​ വിമാനത്തിനും ലാൻഡിങ്ങിന്​ ക്ലിയറൻസ്​ ലഭിച്ചിരുന്നില്ല. റൺവേയിൽ മറ്റൊരു വിമാനമുണ്ടായതാണ്​ പ്രശ്​നത്തിന്​ കാരണമെന്ന്​ പറയുന്നു.

പിന്നീട്​ വിമാനം സുരക്ഷിതമായി ലാൻഡ്​ ചെയ്​തുവെന്ന്​ സർക്കാർ അറിയിച്ചു. അഫ്​ഗാനിസ്​താനുമായുണ്ടാക്കിയ എയർ ബബിൾ കരാർ പ്രകാരമാണ്​ എയർ ഇന്ത്യ കാബൂളിലേക്ക്​ സർവീസ്​ നടത്തുന്നത്​. അതേസമയം, അഫ്​ഗാനിസ്​താനിൽ കുടുങ്ങിയ ഇന്ത്യക്കാരെ പുറത്തെത്തിക്കുന്നതിന്​ പൂർണ്ണ സഹകരണമുണ്ടാവുമെന്ന്​ എയർ ഇന്ത്യ പൈലറ്റുമാരുടെ സംഘടനയും അറിയിച്ചു. നിലവിൽ എയർ ഇന്ത്യ മാത്രമാണ്​ കാബൂളിലേക്ക് ഇന്ത്യയിൽ നിന്നും​ സർവീസ്​ നടത്തുന്നത്​.