കോവിഡ്​ കണക്കിൽ വൈരുധ്യം: ലോക്​ നായക്​ ആശുപത്രി മേധാവിയെ മാറ്റി

ന്യൂഡൽഹി: ലോക്​ നായക്​ ആശുപത്രിയുടെ ഡയറക്​ടർ സ്​ഥാനത്തുനിന്ന്​ ഡോ. ജെ.സി പാസെയെ ഡൽഹി സർക്കാർ മാറ്റി. മെഡിസിൻ ഡിപാർട്​മ​െൻറിലെ ഡോ. സുരേഷ്​കുമാറിനെ തൽ​സ്​ഥാനത്ത്​ നിയമിക്കുകയും ചെയ്​തു. ലോക്​നായക്​ ആ​ശുപത്രിയും സർക്കാരും പുറത്തുവിട്ട കോവിഡ്​ മരണകണക്കുകളിൽ വലിയ അന്തരമുണ്ടെന്ന റിപ്പോർട്ടുകൾ പുറത്തുവന്ന്​​ ദിവസങ്ങൾക്കകമാണ്​ ആശുപ​ത്രി മേധാവിയെ മാറ്റിയത്​.

മേയ്​ ആറുവരെ  47 പേർ മരിച്ചെന്ന കണക്കാണ്​ ലോക്​നായക്​ ആശുപത്രി പുറത്തുവിട്ടത്​. എന്നാൽ ഡൽഹിയിൽ 66 മരണവും ആശുപത്രിയിൽ അഞ്ചു മരണവുമെന്ന കണക്കാണ്​ സർക്കാർ പുറത്തുവിട്ടത്​. ഡൽഹിയിൽ കോവിഡ്​ ബാധിച്ച്​ 173 പേർ മരിച്ചെന്നായിരുന്നു ആശുപത്രികളുടെ റിപ്പോർട്ട്​. എന്നാൽ ഡൽഹി സർക്കാരി​​െൻറ ആരോഗ്യ ബുള്ളറ്റിനിലെ കണക്ക്പ്രകാരം 106 പേർ മാത്രമാണ്​ മരണപ്പെട്ടത്​. തുടർന്ന്​ തെറ്റായ കണക്കുകളാണ്​ ഡൽഹി സർക്കാർ പുറത്തുവിടുന്നതെന്നാ​േരാപിച്ച്​ പ്രതിപക്ഷമടക്കം രംഗത്തുവന്നു.

ഡൽഹിയിൽ ഏറ്റവും കൂടുതൽ കോവിഡ്​ രോഗികളെ പ്രവേശിപ്പിച്ച ആശുപത്രിയാണ്​ ലോക്​നായക്​. അതേസമയം, മേധാവിയെ മാറ്റാൻ മറ്റൊരു കാരണമാണ്​ സർക്കാർ പറയുന്നത്​. 62 വയസിൽ കൂടുതലുള്ളയാളെ ആശുപത്രി മേധാവിയായി നിയമിച്ചതിനെ കേന്ദ്രം വിശദീകരണം തേടിയിരുന്നുവെന്നും അതിനാലാണ്​ ചുമതലയിൽ നിന്ന്​ മാറ്റിയതെന്നും അല്ലാതെ കോവിഡ്​ മരണവുമായി ബന്ധപ്പെട്ടല്ലെന്നും ഡൽഹി സർക്കാർ അറിയിച്ചു. 62 വയസിനു മുകളിലുള്ളവർക്ക്​ അഡ്​മിനിട്രേറ്റീവ്​ പദവി നൽകരുതെന്നാണ്​ കേന്ദ്രആരോഗ്യ മന്ത്രാലയത്തി​​െൻറ ചട്ടമെന്നും അധികൃതർ ചൂണ്ടിക്കാട്ടി.