ആഡംബര കാർ തട്ടിപ്പ്​​; ഡൽഹിയിൽ ജിം ഉടമ അറസ്​റ്റിൽ

ന്യൂഡൽഹി: ആഡംബര കാറുകൾ നൽകാമെന്ന്​ പറഞ്ഞ്​ പണം തട്ടിയ സംഭവത്തിൽ ഡൽഹിയിൽ ഒരാൾ അറസ്​റ്റിൽ. ജിം ഉടമയായ രാഹുൽ നരംഗാണ്​ അറസ്​റ്റിലായത്​. ആഡംബര കാറുകളും വീടുകളും വിൽക്കാനുണ്ടെന്ന്​ പറഞ്ഞ്​ ഇയാൾ നിരവധി പേരിൽ നിന്ന്​ പണം തട്ടിയെന്നാണ്​ കേസ്​.

ഇത്തരത്തിൽ തട്ടിയെടുക്കുന്ന പണം ഇയാൾ ആഡംബര ജീവിതത്തിനാണ്​ ഉപയോഗിച്ചിരുന്നതെന്ന്​ പൊലീസ്​ അറിയിച്ചു. ദക്ഷിണ ഡൽഹിയിലെ ഗ്രേറ്റ കൈലാശ്​ സ്വദേശിയായ നരംഗിനെ ശനിയാഴ്​ചയാണ്​ ഡൽഹി ക്രൈംബ്രാഞ്ച്​ അറസ്​റ്റ്​ ചെയ്​തത്​.

ചിത്തരഞ്​ജൻ പാർക്ക്​ സ്വദേശിയായ സുനിൽ വർമ്മക്ക്​ ആറ്​ ആഡംബര കാറുകൾ നൽകാമെന്ന്​ അറിയിച്ച്​ ഇയാൾ പണം വാങ്ങി. എന്നാൽ, ഒരു കാർ മാത്രമാണ്​ നൽകിയത്​. തുടർന്ന്​ സുനിലി​െൻറ പരാതിയിൽ 2018ൽ പൊലീസ്​ ഇയാൾക്കെതിരെ കേസെടുക്കുകയും അറസ്​റ്റ്​ ചെയ്യുകയുമായിരുന്നു. തുടർന്ന്​ ജാമ്യത്തിലിറങ്ങിയ പ്രതി മുങ്ങി. 2019ൽ ഇയാൾക്കെതിരെ നിരവധി പരാതികൾ ലഭിച്ചുവെങ്കിലും നരംഗിനെ കണ്ടെത്താനായില്ല. ശനിയാഴ്​ച രഹസ്യവിവരത്തെ തുടർന്ന്​ നടത്തിയ അന്വേഷണത്തിലാണ്​ ഇയാൾ വലയിലായത്​.