ടൂൾ കിറ്റ്​ കേസ്​; ദിശ രവി മൂന്ന്​ ദിവസത്തെ ജുഡീഷ്യൽ കസ്റ്റഡിയിൽ

ന്യൂഡൽഹി: കർഷക സമരത്തെ പിന്തുണച്ചുകൊണ്ട്​ പുറത്തിറക്കിയ ടൂൾ കിറ്റ്​ നിർമാണവുമായി ബന്ധപ്പെട്ട്​ അറസ്റ്റിലായ 21കാരി പരിസ്ഥിതി പ്രവർത്തക ദിശ രവിയെ മൂന്ന്​ ദിവസത്തെ ജുഡീഷ്യൽ കസ്റ്റഡിയിൽ വിട്ടു​. ബംഗളൂരുവിലെ വീട്ടിൽ നിന്ന്​ ഇൗ മാസം ആദ്യമാണ്​ ദിശ രവി അറസ്റ്റിലായത്​.

നേരത്തേ അഞ്ചു ദിവസത്തെ കസ്റ്റഡിയിൽ വിട്ട ദിശ രവിയെ പാട്യാല ഹൗസ്​ കോടതിയിൽ വെള്ളിയാഴ്ച ഹാജരാക്കുകയായിരുന്നു. അഡീഷണൽ ചീഫ്​ മെട്രോപൊളിറ്റൻ മജിസ്​ട്രേറ്റ്​ (എ.സി.എം.എം) ജഡ്​ജ്​ ആകാശ്​ ജെയിൻ ആണ്​ ദിശയെ ജുഡീഷ്യൽ കസ്റ്റഡിയിൽ വിട്ടത്​.

ഡൽഹി പൊലീസിനെ പ്രതിനിധീകരിച്ച്​ അഭിഭാഷകനായ ഇർഫാൻ അഹമ്മദ്​ ആണ്​ മൂന്ന്​ ദിവസത്തെ കസ്റ്റഡി ആവശ്യപ്പെട്ടത്​.

അഞ്ച് ദിവസത്തെ പൊലീസ് റിമാൻഡ് അനുവദിച്ചിരു​ന്നെങ്കിലും ദിശ രവി അന്വേഷണത്തിനിടെ ഒഴിഞ്ഞുമാറുന്നതിനാൽ തങ്ങൾക്ക് മൂന്ന് ദിവസത്തെ ജുഡീഷ്യൽ കസ്റ്റഡി വേണമെന്നായിരുന്നു ഡൽഹി പൊലീസ്​ ആവശ്യ​പ്പെട്ടത്​.

ദിശ രവി കുറ്റം കൂട്ടുപ്രതികളായ ശന്തനു മുലുകിനും നികിത ജേക്കബിനും മേൽ ആരോപിക്കുകയാണെന്ന്​ ഇർഫാൻ അഹമ്മദ്​ കോടതിയിൽ അറിയിച്ചു. എഞ്ചിനീയറായ ശന്തനുവിനും അഭിഭാഷകയായ നികിത ജേക്കബിനുമെതിരെ ജാമ്യമില്ലാ വാറണ്ട്​ പുറപ്പെടുവിച്ചതിന്​ ശേഷം ബോംബെ ഹൈകോടതി മുൻകൂർ ജാമ്യം അനുവദിച്ചതായും ഇർഫാൻ അഹമ്മദ്​ പറഞ്ഞു.

തെളിവുകൾ നശിപ്പിക്കാൻ സാധ്യതയുണ്ടെന്ന്​ ദിശ രവിയുടെ അഭിഭാഷകൻ സിദ്ധാർഥ്​ അഗർവാൾ കോടതിയിൽ അറിയിച്ചു. കേസ് ഡയറി ഹാജരാക്കാൻ കോടതി കാത്തിരിക്കണമെന്നും അദ്ദേഹം അഭ്യർഥിച്ചു. ദിശ രവിയുമായി കൂടിക്കാഴ്ച നടത്താൻ 15 മിനുട്ട്​ അനുവദിക്കണമെന്നും സിദ്ധാർഥ്​ അഗർവാൾ ആവശ്യപ്പെട്ടു.