മൂന്നുമാസത്തിനിടെ കണ്ടെത്തിയത്​ 'കാണാതായ 76 കുട്ടികളെ'; ഡൽഹി പൊലീസ്​ ഓഫിസർക്ക്​ സ്​ഥാനകയറ്റം

ന്യൂഡൽഹി: മൂന്നുമാസത്തിനിടെ കാണാതായ 76 കുട്ടികളെ കണ്ടെത്തിയ ഡൽഹി പൊലീസ്​ ഓഫിസർക്ക്​ സ്​ഥാനകയറ്റം. പൊലീസ്​ ഓഫിസറായ സീമ ധാക്കയാണ്​ സ്​ഥാനകയറ്റത്തിന്​ അർഹയായത്​. വടക്കുപടിഞ്ഞാറൻ ഡൽഹിയിലെ സമയ്​പുർ ബഡ്​ലി പൊലീസ്​ സ്​റ്റേഷനിലെ ഹെഡ്​ കോൺസ്​റ്റബ്​ൾ ആണ്​ സീമ ധാക്ക. ഒ.ടി.പി (ഔട്ട്​ ഓഫ്​ ടേൺ പ്രൊമേഷൻ) വഴിയാണ്​ സീമയുടെ നേട്ടം.

ഡൽഹിയിൽ കാണാതാകുന്ന കുട്ടികളെ കണ്ടെത്തുന്നതിനായി ആഗസ്​റ്റ്​ അഞ്ചിന്​ ആരംഭിച്ച പ്രോത്സാഹന പദ്ധതിയാണിത്​. മൂന്നുമാസത്തിനിടെ കാണാതായ 76 കുട്ടികളെയാണ്​ സീമ ​കണ്ടെത്തിയത്​. ഇതിൽ 56 പേർ 14 വയസിൽ താഴെ​യുള്ളവരാണ്​. ഡൽഹിയിൽനിന്ന്​ മാത്രമല്ല, പഞ്ചാബ്​, പശ്ചിമ ബംഗാൾ എന്നീ സംസ്​ഥാനങ്ങളിൽനിന്നും സീമ കു​ട്ടികളെ കണ്ടെത്തിയിരുന്നു. കുട്ടികളിൽ പലരെയും വർഷങ്ങൾക്ക്​ മുമ്പ്​ കാണാതായതായിരുന്നു.

സീമയുടെ കഠിനാധ്വാനത്തെയും ആത്മാർഥതയെയും അഭിനന്ദിച്ച്​ ഡൽഹി പൊലീസ്​ കമീഷണർ എസ്​.എൻ. ശ്രീവാസ്​തവ രംഗത്തെത്തി.

ഒ.ടി.പി പദ്ധതിയിലൂടെ കോൺസ്​റ്റബ്​ൾ/ ഹെഡ്​ കോൺസ്​റ്റബ്​ൾ സ്​ഥാനത്തുള്ള പൊലീസുകാർ ഒരു വർഷത്തിനുള്ളിൽ കാണാതായ 50 കുട്ടികളെ കണ്ടെത്തുകയാണെങ്കിൽ അവർ പ്രെമോഷന്​ അർഹരാകും. ഇതിൽ 50 കുട്ടികളും 14 വയസിന്​ താഴെയുള്ളവരും 15 പേർ എട്ടുവയസിന്​ താഴെയുള്ളവരുമാകണം.