മൂന്നുലക്ഷം ആവശ്യപ്പെട്ട്​ സഹോദരനെ ആരോ ബന്ദിയാക്കിയെന്ന്​ യുവതിയുടെ പരാതി; പ്രതിയെ കണ്ട്​ ഞെട്ടി പൊലീസ്​

ന്യൂഡല്‍ഹി: മൂന്നുലക്ഷം രുപ മോചനദ്രവ്യം ആവശ്യപ്പെട്ട്​ പണംപിടിച്ചുപറി കേസിലെ പ്രതിയെ ബന്ദിയാക്കിയ പൊലീസ്​ ​ഹെഡ്​കോൺസ്റ്റബിൾ പൊലീസ്​ വലയിൽ. ബന്ദിയാക്കപ്പെട്ടയാളെ ​പൊലീസ്​ മോചിപ്പിച്ചത്​ പൊലീസ്​ സ്​റ്റേഷനിൽ നിന്ന്​. പണംപിടിച്ചുപറി കേസിൽ പ്രതി ആയതിനാൽ ഇയാളെയും പൊലീസ്​ അറസ്റ്റ്​ ചെയ്​തു.

ജാമിഅ നഗർ പൊലീസ്​ സ്​റ്റേഷനിലെ ഹെഡ്​ കോൺസ്റ്റബിൾ രാകേഷ്​ കുമാറും സഹായി അമീർ ഖാനും ആണ്​ പിടിയിലായത്​. ജവഹർ പാർക്ക്​ സ്വദേശിയായ വരുൺ എന്ന ആളെയാണ്​ ഇവർ പൊലീസ്​ സ്​റ്റേഷനിൽ തടവിൽ സൂക്ഷിച്ചിരുന്നത്​. മേയ്​ 25ന്​ വരുണിന്‍റെ ​സഹോദരി ഭാരതി, അയാളെ ആരോ തട്ടിക്കൊണ്ടുപോയ ശേഷം മൂന്നുലക്ഷം രൂപ മോചനദ്രവ്യം ആവ​ശ്യപ്പെ​ട്ടെന്ന്​ സൺലൈറ്റ്​ കോളനി പൊലീസ്​ സ്​റ്റേഷനിൽ പരാതിപ്പെടുകയായിരുന്നു. പണവുമായി സരൈ കാലെ ബസ്​സ്​റ്റാൻഡിൽ എത്താനാണ്​ സഹോദരനെ തട്ടിക്കൊണ്ടുപോയവർ നിർദേശിച്ച​െതന്നും അതുപ്രകാരം ഒരുലക്ഷം രൂപയുമായി താൻ അവിടെ നിൽക്കുകയാണെന്നും ഭാരതി പൊലീസിൽ അറിയിച്ചു. ബന്ദിയാക്കിയവര്‍ വരുണിന്‍റെ ഫോണില്‍ നിന്ന് വാട്സ്​ആപ്പ് കോളിലൂടെയാണ് തന്നോട് മോചനദ്രവ്യം ആവശ്യപ്പെട്ടതെന്നും ഭാരതി പറഞ്ഞു.

ഈ നമ്പർ കേന്ദ്രീകരിച്ച്​ നടത്തിയ അന്വേഷണത്തിലാണ്​ ജാമിഅ നഗർ പൊലീസ്​ സ്​റ്റേഷനിലാണ്​ വരുൺ ഉള്ളതെന്നും കോൺസ്റ്റബിൾ രാകേഷ്​ കുമാർ ആണ്​ തട്ടിക്കൊണ്ടുപോയത്​ എന്നും പൊലീസ്​ കണ്ടെത്തുന്നത്​. തുടർന്ന്​ അവിടെയെത്തി വരുണിനെ മോചിപ്പിക്കുകയായിരുന്നു.

മാസങ്ങള്‍ക്കുമുമ്പ് ഗാന്ധിനഗറിലെ ഒരാളില്‍ നിന്ന് വരുണ്‍ 1.5 ലക്ഷം കൊള്ളയടിച്ച കാര്യം സുഹൃത്ത്​ അമീര്‍ഖാൻ രാകേഷ് കുമാറിനോട് പറഞ്ഞിരുന്നു. ഈ പണം വരുണിൽ നിന്ന്​ തട്ടിയെടുക്കാനാണ്​ ഇരുവരും ചേർന്ന്​ തട്ടിക്കൊണ്ടുപോകല്‍ പദ്ധതി ആസൂത്രണം ചെയ്തത്. തുടർന്ന്​ അമീർഖാനെയും പൊലീസ്​ പിടികൂടി. പണം കൊള്ളയടിച്ച കേസില്‍ വരുണിനെയും അറസ്റ്റ്​ ചെയ്​തെന്നും വീട്ടില്‍ നിന്ന് 1.4 ലക്ഷം രൂപ കണ്ടെടുത്തതായും ഡപ്യൂട്ടി കമ്മീഷണർ (സൗത്ത്​ ഈസ്റ്റ്​) ആർ.പി. മീന പറഞ്ഞു.