കോവിഡ്​19: ശാഹീൻബാഗിലെ സമരപന്തലുകൾ പൊലീസ്​ പൊളിച്ചു നീക്കി

ന്യൂഡൽഹി: കോവിഡ് 19 വ്യാപനം തടയുന്നതിനായി ലോക്ക്​ഡൗൺ ഏർപ്പെടുത്തിയ സാഹചര്യത്തിൽ പൗരത്വഭേദഗതി നിയമത്തിനെതിരായി പ്രതിഷേധം നടക്കുന്ന ശാഹീന്‍ബാഗിലെ സമരപന്തലുകൾ പൊലീസ്​ പൊളിച്ച്​ നീക്കി. സമരപന്തലിൽ നിന്നും മാറാൻ വിസമ്മതിച്ച പ്രതിഷേധക്കാരെ പൊലീസ്​ കസ്​റ്റഡിയിലെടുത്തു. പൗരത്വ ഭേദഗതി നിയമത്തിനെതിരെ 101 ദിവസങ്ങൾ രാപ്പകൽ സമരം നടന്ന വേദിയാണ്​ പൊലീസ്​ പൊളിച്ചു നീക്കിയത്​.

കനത്ത പൊലീസ്​ സുരക്ഷയിൽ ചൊവ്വാഴ്​ച രാവി​െലയാണ് പൊളിച്ചു മാറ്റൽ നടപടികൾ ആരംഭിച്ചത്​. ശാഹീൻബാഗ്​ ഏരിയയിലുള്ള എല്ലാ സമരപന്തലുകളും പൊളിച്ച്​ മാറ്റിയിട്ടുണ്ട്​. ​അടച്ചുപൂട്ടൽ നിർദേശം ലംഘിക്കുന്നവർക്കെതിരെ കർശന നടപടിയെടുക്കണമെന്ന്​ കേന്ദ്രസർക്കാർ കഴിഞ്ഞ ദിവസം ഉത്തരവിട്ടിരുന്നു. തുടർന്ന്​ ഡൽഹി പൊലീസ്​ സമരപന്തലുകൾ ഒഴിയാൻ ആവശ്യപ്പെ​ട്ടെങ്കിലും നിയന്ത്രണങ്ങൾ പാലിച്ച്​ സമരം തുടരുമെന്ന്​ പ്രതിഷേധക്കാർ അറിയിക്കുകയായിരുന്നു. എന്നാൽ ലോക്ക്​ഡൗൺ നിർദേശങ്ങൾ ലംഘിച്ചുവെന്ന്​ ചൂണ്ടിക്കാട്ടി പൊലീസ്​ സമരപന്തലുകൾ മുഴുവനായും പൊളിച്ച്​ മാറ്റുകയായിരുന്നു.

കോവിഡ്​ വ്യാപിച്ച സാഹചര്യത്തിൽ സർക്കാർ ഡൽഹിയിൽ നിരോധനാജ്ഞ പ്രഖ്യാപിച്ചിരുന്നു. തുടർന്ന്​ ശഹീൻബാഗിലെ സമരപന്തലിന്​ മുന്നിൽ പൊലീസ്​ സുരക്ഷ ശക്തമാക്കിയിരുന്നു.

വൈ​റ​സ് വ്യാ​പ​നം ത​ട​യാ​നു​ള്ള സ​ർ​ക്കാ​ർ നി​ർ​ദേ​ശ​ങ്ങ​ൾ പാ​ലി​ച്ചാ​ണ് പ്ര​ക്ഷോ​ഭ​ക​ർ സമരം തുടർന്നിരുന്നത്​. സമരപന്തലിൽ ഒ​രു സ​മ​യം അ​ഞ്ച് പേ​ർ മാ​ത്ര​മാ​യി ചുരുങ്ങിയിരുന്നു. 70 വ​യ​സി​ന് മു​ക​ളി​ലും പ​ത്ത് വ​യ​സി​ന് താ​ഴെ​യും പ്രാ​യ​മു​ള്ള​വ​രെ സ​മ​ര വേ​ദി​യി​ല്‍ നിന്നും ഒ​​ഴിവാക്കിയിരുന്നു. സമരക്കാര്‍ക്കായി ബഞ്ചുകളും സാനിറ്റൈസറുകളും സമരപന്തലില്‍ ഒരുക്കുകയും നിശ്ചിത ഇടവേളകളിൽ വേദി അണുവിമുക്തമാക്കുകയും ചെയ്​തിരുന്നു.

സമരപന്തലൊഴിയാൻ നിർദേശം നൽകിയെങ്കിലും പൗരത്വ ഭേദഗതി നിയമം പിന്‍വലിച്ചാല്‍ മാത്രമേ സമരം അവസാനിപ്പിക്കൂ എന്നായിരുന്നു സമരക്കാരുടെ നിലപാട്​.