ലോക്​ഡൗൺ നീട്ടിയാലും ഇല്ലെങ്കിലും ചാന്ദ്​നി ചൗക്​ മേയ്​ 31 വരെ അടഞ്ഞുകിടക്കും

ന്യൂഡൽഹി: ഡൽഹിയിലെ സുപ്രസിദ്ധമായ ചാന്ദ്​നിചൗക്​ മേയ്​ 31 വരെ അടച്ചിടാൻ വ്യാപാരികളുടെ തീരുമാനം. മാർച്ച്​ 25 മുതൽ അടഞ്ഞു കിടക്കുകയാണ്​ പ്രസിദ്ധമായ വ്യാപാര കേന്ദ്രം​. ലോക്​ഡൗണിൽ ഇളവു വരുത്തിയാലും അടച്ചിടാനുള്ള തീരുമാനത്തിൽ മാറ്റമുണ്ടാകില്ലെന്ന്​ വ്യാപാരി യൂനിയൻ പ്രസിഡൻറ്​ സഞ്​ജയ്​ ഭാർഗവ അറിയിച്ചു. 

മൂന്നാംഘട്ട ലോക്​ഡൗൺ ഇന്ന്​ അവസാനി​ക്കാനിരിക്കെയാണ്​ തീരുമാനം. ഡൽഹിയിലെ ഏറ്റവും തിരക്കേറിയ വ്യാപാര കേ​ന്ദ്രമാണ്​ ചാന്ദ്​നിചൗക്​. നഗരത്തിൽ കോവിഡ്​ രോഗികളുടെ എണ്ണവും വർധിക്കുകയാണ്​. ലോക്​ഡൗണിൽ ഇളവുവരുത്തിയാൽ ആളുകൾ തടിച്ചു കൂടുന്നതോടെ സാമൂഹിക അകലം പാലിക്കൽ നടക്കില്ല. അതിനാലാണ്​ വ്യാപാരികളുടെയും ജനങ്ങളുടെയും മറ്റു ജീവനക്കാരുടെയും സുരക്ഷ കണക്കിലെടുത്ത്​ ഈ മാസം 31 വരെ തുറക്കേണ്ടതില്ലെന്ന്​ തീരുമാനിച്ചതെന്നും അദ്ദേഹം പറയുന്നു. 

ഡൽഹിയിൽ 9533 പേർക്കാണ്​ കോവിഡ്​ സ്​ഥിരീകരിച്ചത്​. 129 ​േപർ മരിക്കുകയും ചെയ്​തു. മുഗൾ കാലം മുതൽ​ നിലനിൽക്കുന്ന ചാന്ദ്​നിചൗക്​ ഏറ്റവും വലിയ വസ്​ത്ര വ്യാപാരകേന്ദ്രം കൂടിയാണ്​. 2019 ഒക്​ടോബർ മുതൽ 2020 മാർച്ച്​വരെയുള്ള കണക്ക്​ പ്രകാരം ലക്ഷത്തോളം ആളുകളാണ്​ ഇവിടം സന്ദർശിച്ചത്​.