രണ്ടാം തരംഗം: പുതിയ രോഗികളുടെ എണ്ണം കുറയുന്നതി​െൻറ വേഗത കുറവാണെന്ന്​ വൈറോളജിസ്​റ്റ്​ ഡോ.ജമീൽ

ന്യൂഡൽഹി: കോവിഡ്​ രണ്ടാം തരംഗത്തിൽ ഇന്ത്യയിൽ റിപ്പോർട്ട്​ ചെയ്യുന്ന പുതിയ കേസുകളുടെ എണ്ണം കുറയുന്നത്​ വളരെ പതുക്കെയാണെന്ന്​ പ്രശസ്​ത വൈറോളജിസ്​റ്റ്​ ഡോ.ഷാഹിദ്​ ജമീൽ. രാജ്യത്തെ കോവിഡ്​ കേസുകൾ മൂർധന്യത്തിലെത്തിയെന്ന്​ ഇപ്പോൾ പറയാനാവില്ല. അതിതീവ്രമായാണ്​ രാജ്യത്ത്​ ഇപ്പോഴും കോവിഡ്​ രോഗബാധ തുടരുന്നത്​. പ്രതിദിനം നാല്​ ​ലക്ഷം രോഗികൾ വരെ രാജ്യത്ത്​ റിപ്പോർട്ട്​ ചെയ്​തു. അതുകൊണ്ട്​ കോവിഡ്​ മുർധന്യാവസ്ഥയിലെത്തി​യെന്ന്​ അനുമാനിക്കാം. അത്​ രാജ്യത്തിന്​ ആശ്വാസത്തിന്​ വക നൽകുന്നതാണ്​. എങ്കിലും പുതിയ രോഗികളുടെ എണ്ണം പതുക്കെയാണ്​ കുറയുന്നതെന്ന്​ അദ്ദേഹം പറഞ്ഞു.

കോവിഡ്​ മൂർധന്യാവസ്ഥയി​ലെത്തുന്നതിനാണ്​ നാം പ്രാധാന്യം കൊടുക്കുന്നത്​. മൂർധന്യാവസ്ഥയിലെത്തിയാൽ ജോലി പൂർത്തിയായെന്നാണ്​ പലരും കരുതുന്നത്​. പക്ഷേ പകുതി ജോലി ​മാത്രമേ പൂർത്തിയായിട്ടുള്ളു​. രോഗികളുടെ എണ്ണം കുറയുന്നുണ്ടെങ്കിലും കുറച്ച്​ കാലത്തേക്ക്​ കൂടി പ്രതിദിന വർധന ഉയർന്ന്​ നിൽക്കും. ഏതാനം ആഴ്​ചകൾക്കകം നാല്​ ലക്ഷത്തിൽ നിന്ന്​ പ്രതിദിന കേസുകൾ രണ്ട്​ ലക്ഷമായി കുറയാം. പക്ഷേ ​അതൊരു ചെറിയ സംഖ്യയല്ലെന്ന്​ എല്ലാവരും ഓർമിക്കണമെന്നും അശോക യൂനിവേഴ്​സിറ്റിയിലെ ത്രിവേദി സ്​കൂൾ ഓഫ്​ ബയോസയൻസ്​ ഡയറക്​ടറായ ഡോ.ജമീൽ പറഞ്ഞു.

ജനുവരിയിൽ കോവിഡ്​ അവസാനിച്ചുവെന്ന നിഗമനത്തിലേക്ക്​ സർക്കാർ എത്തിയെന്ന്​ അദ്ദേഹം കൂട്ടിച്ചേർത്തു. ഇത്​ തെറ്റായ തീരുമാനമായിരുന്നു. ഓക്​സിജൻ വിതരണത്തിനായി കോവിഡ്​ ടാസ്​ക്​ ഫോഴ്​സിനെ നിയമിക്കാനുള്ള സുപ്രീംകോടതി തീരുമാനത്തിലും അദ്ദേഹം അതൃപ്​തി പ്രകടിപ്പിച്ചു.