ഉത്തരാഖണ്ഡിൽ കോവിഡ്​ രോഗികളുടെ മൃതദേഹങ്ങൾ കടിച്ചുവലിച്ച് നായ്കൾ; ഞെട്ടലിൽ നാട്ടുകാർ

ഉത്തരകാശി: ഉത്തരാഖണ്​ഡ​ിലെ ഉത്തരകാശിയിൽ ഭാഗീരഥി നദിക്കരയിൽ അടിഞ്ഞ മൃതദേഹങ്ങൾ സമൃദ്ധമായി ആഹരിച്ച്​ പട്ടികൾ വിഹരിക്കുന്ന വിഡിയോകൾ സമൂഹ മാധ്യമങ്ങളിൽ പടരുന്നു. പലതും പാതി കരിഞ്ഞ നിലയിലുള്ള മൃതദേഹങ്ങളായതിനാൽ കോവിഡ്​ ബാധ​ിച്ച്​ മരിച്ചവരുടെതാണെന്നാണ്​ സംശയം. കഴിഞ്ഞ ദിവസങ്ങളിൽ പെയ്​ത മഴയെ തുടർന്ന്​ പുഴയിൽ വെള്ളമുയർന്നിരുന്നു. ഇതേ തുടർന്നാണ്​ മൃതദേഹങ്ങൾ പുഴക്കരയിലെത്തിയത്​.

സംഭവം കണ്ട്​ ഞെട്ട​െലാഴിയാത്ത നാട്ടുകാർ ജില്ലാ ഭരണകൂടവും മുനിസിപ്പൽ കോർപറേഷനും അടിയന്തരമായി നടപടി സ്വീകരിക്കണമെന്ന ആവശ്യവുമായി രംഗത്തെത്തിയിട്ടുണ്ട്​.

പരാതി ലഭിച്ചതായും ഇത്തരം മൃതദേഹങ്ങൾ സംസ്​കരിക്കാൻ ഒരാളെ ചുമതലപ്പെടുത്തിയതായും മുനിസിപ്പാലിറ്റി പ്രസിഡന്‍റ്​ രമേശ്​ സെംവാൾ പറഞ്ഞു.

ഉത്തരാഖണ്​ഡിലെ ചില ഭാഗങ്ങളിൽ അടുത്തിടെയായി മരണസംഖ്യ കൂടുതലാണെന്നും ചില മൃതദേഹങ്ങൾ പൂർണമായി ദഹിപ്പിക്കുന്നില്ലെന്ന്​ കണ്ടെത്തിയതായും അദ്ദേഹം കൂട്ടിച്ചേർത്തു.

നേരത്തെ ഉത്തർ പ്രദേശ്​, ബിഹാർ സംസ്​ഥാനങ്ങളിൽ പുഴകളിൽ മൃതദേഹങ്ങൾ വ്യാപകമായി ഒഴുകി നടന്നത്​ വാർത്തയായിരുന്നു. ഇത്​ ആവർത്തിക്കാതിരിക്കാൻ ഈ സംസ്​ഥാനങ്ങളിൽ കേന്ദ്ര സർക്കാർ ഇടപെട്ടിരുന്നു.