മുംബൈ പൊലീസിൽ കൂട്ട സ്ഥലംമാറ്റം; പ്രമാദമായ കേസുകൾ അന്വേഷിച്ചിരുന്നവരെയടക്കം 86 പേരെയാണ്​ മാറ്റിയത്​

മുംബൈ: പുതിയ പോലീസ് കമ്മീഷണറായി ഹേമന്ത് നാഗ്രാലെ ചുമതലയേറ്റതിന്​ പിന്നാലെ മുംബൈ പൊലീസിൽ ദിവസങ്ങൾക്കുള്ളിൽ കൂട്ട സ്ഥലം മാറ്റം. ക്രൈം ബ്രാഞ്ചിൽ പ്രമാദമായ കേസുകൾ അന്വേഷിച്ചിരുന്ന മുതിർന്ന ഉദ്യോസ്ഥരെയടക്കം 86 പൊലീസ്​ ഉദ്യോഗസ്ഥരെയാണ്​ സ്ഥലം മാറ്റിയത്​. ട്രാഫിക്​ അടക്കം വിവിധ സ്​റ്റേഷനുകളിലേക്കാണ്​ മിക്കവരെയും മാറ്റിയിരിക്കുന്നത്​. മുകേഷ് അംബാനിയുടെ വീടിനു മുന്നിൽ കാറിൽ സ്ഫോടകവസ്തു കണ്ടെത്തിയ കേസിൽ എന്‍.ഐ.എ. അറസ്റ്റ്​ ചെയ്ത ക്രൈം ബ്രാഞ്ച് ഉദ്യോഗസ്ഥന്‍ സച്ചിന്‍ വാസയുടെ സഹപ്രവർത്തകരെ ഉൾ​പ്പടെയാണ്​​ സ്ഥലം മാറ്റിയിരിക്കുന്നത്​.

ആഭ്യന്തര മന്ത്രി അനിൽ ദേശ്​മുഖ്​ മുഖ്യമന്ത്രി ഉദ്ദവ്​ താക്കറയുമായി കഴിഞ്ഞ ദിവസം കൂടിക്കാഴ്ച നടത്തിയതിന്​ പിന്നാലെയാണ്​ സ്ഥലമാറ്റ നടപടികൾ തു​ടങ്ങിയത്​. ക്രൈം ഇന്‍റലിജൻസ്​ യൂണിറ്റിൽ വാസയുടെ സഹപ്രവര്‍ത്തകനും അസി. ഇന്‍സ്‌പെക്ടര്‍മാരുമായ റിയാസുദ്ദീന്‍ കാസിയെ ലോക്കല്‍ ആംസ് യൂനിറ്റിലേക്ക്​ തരംതാഴ്ത്തിയാണ്​ സ്ഥലം മാറ്റം നൽകിയിരിക്കുന്നത്​.

മറ്റൊരുദ്യോഗസ്ഥനായ പ്രകാശ് ഹൊവാള്‍ഡിനെ മലബാര്‍ ഹില്‍ പോലീസ് സ്‌റ്റേഷനിലേക്കാണ്​ സ്ഥലംമാറ്റിയത്. 65 ഓളം ക്രൈം ബ്രാഞ്ച്​ ഉദ്യോഗസ്ഥരിൽ പലരെയും സ്‌പെഷ്യല്‍ ബ്രാഞ്ചിലേക്കും ട്രാഫിക്കിലേക്കുമാണ്​ മാറ്റിയിരിക്കുന്നത്​. അതെ സമയം പൊലീസുകാരുടെ കൂട്ടസ്ഥലംമാറ്റത്തെ അപലപിച്ച് ബി.ജെ.പി. രംഗത്തെത്തി.