'കമിതാക്കൾക്ക്​ ഡേറ്റിങ്ങിന്​ കോഫിഷോപ്പുകൾ'; പ്രകടന പത്രികയിൽ കോൺ​ഗ്രസ്​, വിവാദമുയർത്തി ബി.ജെ.പി

വഡോദര: ഗുജറാത്തിലെ വഡോദര തദ്ദേശ തെരഞ്ഞെടുപ്പിലെ കോൺഗ്രസ്​ പ്രകടന പത്രികക്കെതിരെ ബി.ജെ.പി. യുവാക്കൾക്ക്​ വേണ്ടിയുള്ള കോൺ​ഗ്രസ്​ പ്രകടന പത്രികയിലെ വാഗ്​ദാനം ലവ്​ ജിഹാദ്​ പ്രോത്സാഹിപ്പിക്കുന്നതാണെന്ന ആരോപണമാണ്​​ ബി.ജെ.പിയുടെ ​പ്രചരണ ആയുധം.

കമിതാക്കൾക്ക്​ സല്ലപിക്കാൻ കോഫി ഷോപ്പുകൾ എന്നതാണ്​ കോൺഗ്രസ്​ വാഗ്​ദാനം. ഭയമില്ലാ​െത യുവജനങ്ങൾക്ക്​ സംസാരിക്കാൻ ഇടമൊരുക്കുക എന്നതാണ്​ കോൺഗ്രസ്​ ലക്ഷ്യം.

എന്നാൽ ഇത്തരം കോഫി ഷോപ്പുകൾ ഇന്ത്യൻ മൂല്യങ്ങളെ തകർക്കുമെന്നും ലവ്​ ജിഹാദിനെ പ്രോത്സാഹിപ്പിക്കുമെന്നും ബി.ജെ.പി ആരോപിച്ചു.

'കോൺഗ്രസ്​ ഇന്ത്യൻ സംസ്​കാരത്തെ ഒരിക്കലും അംഗീകരിച്ചിട്ടില്ല. ഡേറ്റിങ്​ ഒരു പാശ്ചാത്യ സംസ്​കാരമാണ്​. പാശ്ചാത്യ സമൂഹത്തിന്​ ഡേറ്റിങ്​ ആവശ്യമാണ്​. കാരണം അവരിൽ കൂടുതൽപേരും കുടുംബമായി ജീവിക്കാൻ ആഗ്രഹിക്കുന്നില്ല. ഇന്ത്യയി​ൽ ​പ്രത്യേകിച്ച്​ ഗുജറാത്തിൽ എല്ലാവരും കുടുംബമായി ജീവിക്കാൻ ആഗ്രഹിക്കുന്നു. കുടുംബവുമായി അവർ സമയം ചെലവഴിക്കുന്നു. അതിനാൽ ഇത്തരം ഡേറ്റിങ് ഇവിടെ ആവശ്യമില്ല' -വഡോദര ബി.ജെ.പി പ്രസിഡൻറ്​ വിജയ്​ ഷാ പറഞ്ഞു.

കോൺഗ്രസ്​ പ്രകടന പത്രിക യുവജനങ്ങളെ വഴിതെറ്റിക്കും. ഡേറ്റിങ്ങിന്​ പിന്നാലെ മദ്യവും മയക്കുമരുന്നിനെയും പ്രോത്സാഹിപ്പിക്കും. ഹിന്ദു പെൺകുട്ടികളെ വഴിതെറ്റിക്കാൻ നടക്കുന്ന ഒരു സമൂഹമുണ്ട്​. ഇത്തരം ഡേറ്റിങ്ങുകൾ പിന്നീട്​ ലവ്​ ജിഹാദായി മാറും. അടുത്ത ​നിയമ സഭ തെരഞ്ഞെടുപ്പിൽ ലവ്​ ജിഹാദ്​ നിയമം കൊണ്ടുവരുമെന്നും ഷാ പറഞ്ഞു.

എന്നാൽ ബി.ജെ.പിയുടെ ആരോപണങ്ങൾ കോൺഗ്രസ്​ തള്ളി. സമൂഹം വളർന്നുകൊണ്ടിരിക്കുകയാണെന്നും മാറ്റം ആവശ്യമ​ാണെന്നും കോൺഗ്രസ്​ നേതാവ്​ ചന്ദ്രകാന്ത്​ ​ശ്രീവാസ്​തവ പറഞ്ഞു.

ഗുജറാത്തിലെഘ ആറുനഗരങ്ങളിലാണ്​ തദ്ദേശ തെരഞ്ഞെടുപ്പ്​. ഫെബ്രുവരി 21നാണ്​ വോ​ട്ടെടുപ്പ്​. അഹ്​മദാബാദ്​, സൂറത്ത്​, രാജ്​കോട്ട്​, വഡോദര, ജാംനഗർ, ഭാവ്​നഗർ എന്നിവിടങ്ങളിലാണ്​ തെരഞ്ഞെടുപ്പ്​ നടക്കുക.