തമിഴ്​നാട്ടിൽ ദലിത്​ വനിത പഞ്ചായത്ത്​ പ്രസിഡന്‍റിന്‍റെ ഭർത്താവിന്​ നേരെ ആക്രമണം; രണ്ടുപേർ പിടിയിൽ

ചെന്നൈ: റാണിപേട്ട ജില്ലയിലെ അറകോണത്ത്​ ദലിത്​ വനിത പഞ്ചായത്ത്​ പ്രസിഡന്‍റിന്‍റെ ഭർത്താവിനെ വണ്ണിയർ സമുദായത്തിൽപ്പെട്ട സായുധ സംഘം ക്രൂരമായി ആ​ക്രമിച്ചു. അറകോണം വേടൽ ഗ്രാമപഞ്ചായത്ത്​ പ്രസിഡന്‍റ്​ സ്ഥാനം പട്ടികജാതി വനിതകൾക്കായാണ്​ സംവരണം ചെയ്തിരുന്നത്​. ഈ നിലയിൽ ആദിദ്രാവിഡ വിഭാഗത്തിൽപ്പെട്ട 42കാരിയായ ഗീതയാണ്​ പഞ്ചായത്ത്​ പ്രസിഡന്‍റ്​ പദവിയിലേക്ക്​ തെരഞ്ഞെടുക്കപ്പെട്ടത്​.

ഇവരുടെ ഭർത്താവ്​ മൂർത്തിയാണ്​(47) ആക്രമണത്തിനിരയായത്​. ഇദ്ദേഹത്തെ ചെന്നൈയിലെ രാജീവ്​ഗാന്ധി ആശുപത്രിയിലേക്ക്​ മാറ്റി. കേസുമായി ബന്ധ​പ്പെട്ട്​ രാജഗോപാൽ, ശങ്കർ എന്നിവരെ പൊലീസ്​ അറസ്റ്റ്​ ചെയ്തു. മറ്റു പ്രതികൾക്കായി പൊലീസ് അന്വേഷണം ഊർജിതമാക്കി. മൂർത്തി ഈയിടെയാണ്​ കോൺഗ്രസിൽ ചേർന്നത്​. വണ്ണിയർ ജാതിയിൽപ്പെട്ടവർക്ക്​ നിർണായക സ്വാധീനമുള്ള ഗ്രാമത്തിൽ ദലിത്​ വനിത പഞ്ചായത്ത്​ പ്രസിഡന്‍റായത്​ സമുദായംഗങ്ങളിൽ കടുത്ത അസംതൃപ്തി​ പടർത്തിയിരുന്നു.

അഞ്ച്​ മാസത്തിനിടെ രണ്ട്​ തവണയാണ്​ ഗീതക്കും ഭർത്താവിനും നേരെ ആക്രമണം ഉണ്ടായത്​. വണ്ണിയർ വിഭാഗത്തിന്​ പാട്ടാളി മക്കൾ കക്ഷിയുടെ പിന്തുണയാണുള്ളത്​. രാഷ്ട്രീയകക്ഷി ഭേദമെന്യേ പഞ്ചായത്തിലെ മറ്റു വാർഡ്​ അംഗങ്ങളും ദലിത്​ വനിത പഞ്ചായത്ത്​ പ്രസിഡന്‍റുമായി സഹകരിക്കാറില്ല. പൊതുപ്രവർത്തനങ്ങളിൽ ഗീതയോടൊപ്പം മൂർത്തിയും സജീവമാണ്​. ആറു ദശാബ്ദകാലത്തിനിടെ ഇതാദ്യമായാണ്​ ഗ്രാമപഞ്ചായത്ത്​ ഭരണ നിർവഹണം ദലിത്​ പ്രസിഡന്‍റിന്‍റെ നിയന്ത്രണത്തിലായത്​. പൊലീസിൽ പരാതികൾ നൽകിയാലും നടപടി ഉണ്ടാവാറില്ലെന്ന്​ മൂർത്തി- ഗീത ദമ്പതികളുടെ മകൻ ശരവണൻ മാധ്യമ പ്രവർത്തകരോട്​ പറഞ്ഞു.