രാജസ്ഥാനിൽ ദലിത് യുവതി ദിവസങ്ങളോളം കൂട്ട ബലാത്സംഗത്തിന് ഇരയായി; പൂജാരി മുഖ്യപ്രതി

രാജസ്ഥാനിലെ അജ്മീരിൽ ദലിത് യുവതി ദിവസങ്ങളോളം കൂട്ട ബലാത്സംഗത്തിന് ഇരയായി. യുവതിയുടെ കുടുംബത്തിൽ പൂജകൾക്കെത്തിയ ഒരു മത പുരോഹിതനും ബലാത്സംഗം ചെയ്ത പ്രതികളിൽ ഉൾപ്പെടും. 25 വയസുള്ള യുവതിയാണ് തുടർച്ചയായി കൂട്ട ബലാത്സംഗത്തിന് ഇരയായത്. യുവതിയുടെ കുടുംബത്തിന് വേണ്ടി പ്രാർത്ഥനകൾ നടത്തിയിരുന്നയാളാണ് ബലാത്സംഗത്തിന് പിടിയിലായ പൂജാരിയായ സഞ്ജയ് ശർമ്മ. ഇയാൾ കുറ്റകൃത്യത്തിന്റെ വീഡിയോ റെക്കോർഡുചെയ്‌തതായും ആരോപണമുണ്ട്.

വീട്ടിൽ തനിച്ചായ സമയത്താണ് പ്രതിയായ സഞ്ജയ് ശർമ്മ ആദ്യമായി യുവതിയെ ബലാത്സംഗം ചെയ്യുകയും യുവതിയുടെ വീഡിയോ പകർത്തുകയും ചെയ്തത്. പിന്നീട്, ഈ വീഡിയോയുടെ അടിസ്ഥാനത്തിൽ യുവതിയിൽ നിന്ന് പണം തട്ടിയെടുക്കുകയും പിന്നീട് ചിലരുമായി ചേർന്ന് അവളെ വീണ്ടും ബലാത്സംഗം ചെയ്യുകയും ചെയ്തുവെന്ന് അജ്മീർ നോർത്ത് ഡെപ്യൂട്ടി പൊലീസ് സൂപ്രണ്ട് ഛവി ശർമ്മ പറഞ്ഞു.

പ്രതികൾ യുവതിക്ക് ചില മയക്കമരുന്ന് നൽകിയിരുന്നു. എത്ര പേർ അവളെ കൂട്ടബലാത്സംഗം ചെയ്തുവെന്ന് പറയാൻ കഴിയില്ലെന്ന് ഛവി ശർമ്മ പറഞ്ഞു. പീഡനത്തിനിരയായ യുവതിക്ക് ഒരു കുട്ടിയുണ്ട്. കുറച്ച് ദിവസങ്ങളായി പ്രതികൾ തന്നെ ബലം പ്രയോഗിച്ച് തടവിലാക്കിയെന്നും നിരവധി തവണ കൂട്ടബലാത്സംഗത്തിന് ഇരയായെന്നും യുവതി പരാതിയിൽ പറയുന്നു. ഭർത്താവിനെയും കുഞ്ഞിനെയും കൊന്നുകളയുമെന്ന് പുരോഹിതൻ യുവതിയെ ഭീഷണിപ്പെടുത്തിയിരുന്നു. വീഡിയോ വൈറലാക്കുമെന്നും അയാൾ പറഞ്ഞിരുന്നു.