ജാതി മാറി പ്രണയിച്ച ദലിത്​ യുവാവിനെ തല്ലിക്കൊന്നു

പൂണെ: ജാതി മാറി പ്രണയിച്ചതിന്​ 20കാരനായ ദലിത്​ യുവാവിനെ പെൺകുട്ടിയുടെ ബന്ധുക്കൾ ക്രൂരമായി ആക്രമിച്ച്​ കൊലപ്പെടുത്തി. മരണമൊഴിയിലാണ്​ പ്രണയിനിയുടെ ബന്ധുക്കളായ ആറുപേർ ചേർന്ന്​ ആക്രമിച്ച വിവരം വിരാജ്​ വിലാസ്​ ജഗ്​പഥ്​​ വെളിപ്പെടുത്തിയത്​. 

മോ​ട്ടോർ സൈക്കിളിൽ വരികയായിരുന്ന യുവാവിനെ പ്രതികൾ ആദ്യം ടെേമ്പാ ഇടിച്ച്​ വീഴ്​ത്തുകയായിരുന്നു. താഴെ വീണ ശേഷം കഷ്​ടപ്പെട്ട്​ എഴുന്നേറ്റ യുവാവിനെ ഇരുമ്പ്​ ദണ്ഡുകൾ കൊണ്ടും വലിയ കല്ലുകൾ ഉപയോഗിച്ചും നിർദയം ആക്രമിച്ചു. സ്വകാര്യ ആശുപത്രിയിൽ ചികിത്സയിൽ കഴിയുന്ന വേളയിലാണ്​ യുവാവ്​ ക്രൂരകൃത്യം കുടുംബാംഗങ്ങളോട്​ വിവരിച്ചത്​. ക്രൂരമായി പരിക്കേറ്റ്​ നിലത്ത്​ കിടന്ന യുവാവിൻെറ മുഖത്തേക്ക്​ പെൺകുട്ടിയുടെ പിതാവ്​ ജഗദീഷ്​ കാ​തെ തുപ്പിയതായും ആരോപണമുണ്ട്​.

യുവാവിൻെറ മൊഴിയുടെ അടിസ്​ഥാനത്തിൽ ആറു പ്രതികളെയും അറസ്​റ്റ്​ ചെയ്​തു. ഇതിൽ പ്രായപൂർത്തിയാകാത്ത രണ്ടുപേർ ഉൾപെട്ടിട്ടുണ്ട്​. ഇവരെ ശിശു സംരക്ഷണ കേന്ദ്രത്തിലേക്ക്​ മാറ്റി. കോടതിയിൽ ഹാജരാക്കിയ പ്രതികളെ ഏഴുദിവസത്തെ പൊലീസ്​ കസ്​റ്റഡിയിൽ വിട്ടു. കൊലപാതകം, നിയമവിരുദ്ധമായ സംഘം ചേരൽ, കലാപം സൃഷ്​ടിക്കൽ, മാരകായുധം കൊണ്ട്​ കലാപം, കുറ്റംകൃത്യം ചെയ്യാനുള്ള നിയമ വിരുദ്ധമായ സംഘം ചേരൽ എന്നീ കുറ്റങ്ങൾക്കൊപ്പം പട്ടിക ജാതി- പട്ടിക വർഗ സംരക്ഷണ നിയമത്തിലെ വകുപ്പുകളും പ്രതികൾക്കെതിരെ ചേർത്തിട്ടുണ്ട്​.  

ജൂൺ ഏഴിന്​ രാത്രി പ്രതികൾ പ്രണയ ബന്ധത്തെക്കുറിച്ച്​ സംസാരിക്കാനായി വിരാജ്​ ജഗ്​പഥിനെ പെൺകുട്ടിയുടെ വീട്ടിലേക്ക്​ വിളിച്ചുവരുത്തിയിരുന്നതായി സഹോദരൻ സാഗർ ജഗ്​പഥ്​ പറഞ്ഞു.  അവിടെ വെച്ച്​ വിരാജിനെ ജാതിയമായി അപമാനിക്കുകയും അധിക്ഷേപിക്കുകയും ചെയ്​തു. തിരികെ വീട്ടിലേക്ക്​ മടങ്ങുന്ന വഴിയാണ്​ ആക്രമണം​. 

കേസിൽ എഫ്​.ഐ.ആർ രജിസ്​റ്റർ ചെയ്​തതായി എ.സി.പി ശ്രീധർ ജാദവ്​ പറഞ്ഞു. ജഗദീഷ്​ യുവാവിനെ താഴ്​ന്ന ജാതിക്കാ​രനെന്ന്​ പറഞ്ഞ്​ അധിക്ഷേപിക്കുന്ന വേളയിൽ മറ്റ്​ പ്രതികൾ ഇരുമ്പ്​ വടികളും കല്ലുകളു​ം കൊണ്ട്​ ആക്രമം തുടരുകയായിരുന്നുവെന്ന്​ എഫ്​.ഐ.ആറിൽ പറയുന്നു.